إلهام شاهين عن منع فيلم «الملحد»:«العيال الصغيرة بيتفرجوا على كل الافلام من مختلف العالم»
![إلهام شاهين إلهام شاهين](https://media.besraha.com/2024/9/large/27491651836647202409071029262926.jpg)
علقت الفنانة إلهام شاهين عن فيلم «الملحد» بعد تأجيل عرضه أكثر منه مرة وحديث البعض عن منعه.
وقالت إلهام شاهين خلال لقائها في برنامج "ضيفي مع معتز الدمرداش" عبر قناة الشرق الإخبارية: "عملوا لفيلم "الملحد" دعاية بعد ما قالوا أنه اتوقف عرضه وهيخلوا الناس كلها عايزة تشوفه".
وتابعت إلهام شاهين: "إيه المشكلة في اسم الفيلم "الملحد" هو مفيش ملحدين في الحياة؟ دي نماذج موجودة ما المانع إننا نلقي الضوء عليها ونقول إن دول غلط، أنا لما ألقي الضوء على أي حاجة غلط في الحياة بغرض تصحيحها".
وأكملت إلهام شاهين: "أنا مشفتش الفيلم لكن اعتقد في الآخر لازم الملحد دا هيقتنع إن في إله لهذا الكون وهو اللي بيدير هذا الكون، إنت ممكن تصلح أفكار ناس من خلال العمل".
وأعطت إلهام شاهين مثالا بالأعمال التي تناولت فكرة إدمان المخدرات قائلة: "لما بعمل فيلم عن الإدمان بجيب المدمن بياخد الشمة وبيبقى مبسوط وبجيبه في آخر الفيلم واخد جرعة زيادة ومات، أو بجيبه ومش معاه حق المخدرات وهيتجنن، لما جبته في الأول مبسوط هل دا بيشجع الناس، لأ اللي هتستفيده من الفيلم في الآخر".
وأكملت إلهام شاهين: "أنا مش مع فكرة منع أي حاجة لا كلام في الدين ولا السياسة، في 3 حاجات الدين والسياسة والجنس هما القلق بتوع الرقابة لكن إحنا لو مشفناش أفلام مصرية هنشوف أفلام أمريكية بتتكلم عن الإلحاد والجنس والأديان والسياسات، المنع غلط العيال الصغيرة قاعدين طول النهار على تليفونات صغيرة بيتفرجوا على كل الافلام من كل العالم".
الجدير بالذكر أن آخر أعمال إلهام شاهين مشاركتها في مسلسل «الفريدو» وهو عمل مكون من 10 حلقات عن كتاب «55 مشكلة حب» للدكتور مصطفى محمود، وهو من تأليف عمرو محمود ياسين وورشته، حيث شارك بتأليف وكتابة الحلقات سارة مصباح وإخراج عصام نصار، وبطولة أحمد فهمي وندى موسى وأمير شاهين وعفاف رشاد وغيرهم من النجوم.