دعاء فاروق تهاجم تقديم مسلسل عن سفاح التجمع: هي القصص عدمت؟

شنت الإعلامية دعاء فاروق الهجوم على فكرة تقديم قصة حياة «سفاح التجمع»، في عمل درامي، وعبرت عن استيائها من طرح الفكرة، لأنها تشجع على العنف.

قالت دعاء فاروق خلال مقطع فيديو نشرته عبر حسابها على «إنستجرام»: «قريت خبر أنهم بيدورا مين يعمل قصة سفاح التجمع.. هو فيه حاجة معينة فاتتنا فعايزين تشربوهلنا بالعافية، هو القصص عدمت؟».

أوضحت: «المحامين مش راضيين يترافعوا عنه، اللي يقولك اشمئزيت واللي أصيب بغثيان، واحنا ملناش أهل يسألوا علينا؟ ولا محامي راضي يترافع في القضية دي، من كم البشاعة اللي في تفاصيلها، وأنتوا بتدوروا على مين ممثل يعمل الدور من عظمته».

وأشارت: «والشاب ده مش له ابن وأم وأهل؟، بتوثقوا حياة مين؟، إيه فكرة توثيق حياة الناس المريضة المؤذية، طبعا هيطلع العظام يقولوا إيه اللي فهمك أنتي؟ السينما العالمية كلها قتلة متسلسلين، طيب أنتوا عندكوا علم أن سفاح التجمع كان بيتفرج على سلسلة أفلام معينة وبيعمل زيها، مش كفاية واحد؟».

اختتمت: «إيه الحب في أفلام الرعب والقتل، بتاكلوا فيشار وتتفرجوا على أفلام دم وقتل، طيب لو الإنسان متصالح ومش هيقلد هذا الشخص، أعمل حساب اللي عنده مرض نفسي وممكن تلزق فيه الشخصية ويعملها في الحقيقة مش خايفين على ولادكم، عدمت المشاكل الاجتماعية اللي نعرف نطرحها عادي، وبعدين لما أسمع أنهم هيحملوا قصة خالد بن الوليد يقولك ده نموذج مينفعش يتعمل عشان الدموية».