عزيز الشافعي: شيرين عبد الوهاب معرضة لغرامة 20 مليون جنيه لطرح أغنيتين

كشف الشاعر والملحن عزيز الشافعي عن أن المطربة شيرين عبد الوهاب معرضة لدفع غرامة قيمتها 20 مليون جنيه، وذلك بسبب إخلالها بتعاقدها مع شركة "روتانا" وطرح أغنيتين جديدتين هما "اللي يقابل حبيبي" و"بتمنى أنساك".

وقال عزيز الشافعي في فيديو نشره عبر قناته الرسمية في موقع يوتيوب: "إمبارح نزلت غنوتين من ألحاني لشيرين عبد الوهاب، ومبسوط جدا إن الغنوتين دول بالذات نزلوا، والمشكلة عندي إني كنت أتمنى ينزلوا بطريقة أحسن من كده والناس تشوفهم وتسمعهم في يوتيوب وكل المنصات، ونشوف النجاح بالأرقام والمشاهدات والتفاعل".

وأضاف: "شوفنا ده إمبارح على تويتر، وشوفناه شوية على يوتيوب قبل ما روتانا تقفل الأغاني، وأنا عارف شيرين عملت كده ليه، شيرين وعدت جمهورها إنها هتنزل الأغاني، وأصعب حاجة إن الفنان يبقى عايز ينزل ويغني ويشتغل، ويتمنع عشان ورق أو توقيعات أو وجهات نظر أو مواقف قانونية".

وتابع عزيز الشافعي: "أنا باسمع من محامي روتانا كلام محترم، بيقول مثلا إن شيرين دفعت 10 مليون أو 8 مليون جنيه مش علشان الشرط الجزائي، لكن علشان الإخلال بالعقد، وإن في كل إخلال بالعقد هتدفع 10 مليون جنيه، يعني الغنوتين بتوع إمبارح هتدفع عليهم 20 مليون جنيه المفروض، والعقد مع روتانا مستمر وهي مطالبة تقدم أغاني وده موقف صعب جدا".

وأكمل: "من الناحية الثانية محامي شيرين، هل ورقك سليم إنك تنزل أغاني؟ ولو سليم إزاي روتانا وقفتهم؟ هل روتانا عندها حق ولا معندهاش حق؟ وليه الأمور القانونية دي مش بتنتهي بشكل واضح؟ مش معقول اتنين محامين كبار يقولوا كلام عكس بعض".

أوضح عزيز الشافعي أنه مستاء من طريقة طرح الأغنيتين بقوله: "الاستعجال في طرح الأغاني حاجة ضايقتني، لكن شيرين كانت مجبرة عليه وأنا متفهم موقفها وبادعمها مهما حصل، والاستعجال خلى أغنية بتمنى أنساك تنزل قبل ما الورق والأمور المالية تخلص".

واختتم عزيز الشافعي رسالته قائلا: "يا رب شيرين تقدر تعدي الأزمة دي، وأنا فرحان بحماسها وشجاعتها، ومقدر إنها ممكن تكون غلطت أو في حاجة غلط في التعاقد أو إنها تعدت على حق حد، لكن أتمنى يبقى في حد كبير في المزيكا أو في القانون يحل الإشكالية دي، ويدي للناس حقوقها، ويخلي شيرين تشتغل وتمتعنا وتخرج من مشاكلها الخاصة. مبروك لشيرين، ومبروك لجمهور شيرين وكل الناس، وإن شاء الله نسمع الأغاني والمشاكل القانونية تتحل".