فريدة عثمان تهاجم اتحاد السباحة وتكشف أسباب غيابها عن أولمبياد باريس

فتحت فريدة عثمان السباحة المصرية، النار على المسئولين في اتحاد السباحة بعد خروجها في فيديو توضح فيه أسباب عدم تأهلها لأولمبياد باريس.

وقالت فريدة عثمان في بيان لها:

1. أنا عملت الفيديو علشان الناس عمالة تسألني إيه الأسباب اللى خلتني ما روحش الأولمبياد وأنا استنيت بعد الأولمبياد لما تخلص علشان شوفت كم الهجوم على الأبطال شنیع وفكرت في مستقبل الأجيال القادمة، أنا خلاص أخذت حقى من حب الناس وهستفيد إيه من الفيديو ده.

2- أنا فعلا روحت بطولات تأهيلية و لو ما كنش اتقالي اني ممكن اطلع universality کنت ممكن أكمل محاولات ولكن كنت بأشترك في البطولات بس للتدريب عشان كنت ضمنة الـ universality زي ما بلغوني، ودة يرجع برضه لعدم الدراية الكاملة للوائح (اللائحة بتتغير كل أولمبياد).. وبعد أولمبياد طوكيو نظام الـ universality اتغير ولكن الاتحاد لم يكن عنده علم علشان كدة من يوم 20 إلی 28 يونيو 2024 فيه مراسلات رايحة جاية ما بين الاتحاد واللجنة الأولمبية الدولية لسه بيستفسروا أنا ليه ما ينفعش اروح universality لأن سباقاتي اتحطت على السيستم يوم 18 يونيو و الـ IOC ردت بالرفض يوم 19.

3- الرعاة بتوعى طول عمرهم supportive وعمرهم ما كانوا هيغيروا موقفهم من دعمى بسبب تأهيلي من عدمه لأنهم كانوا شركاء نجاح طول مشواري الطويل.

4- الإدارة لازم يحصل فيها تغيير

5- أنا ما قلتش إنهم ما صرفوش عليّ هما أدوني الدعم المادى ولكن برضه بعد حصولي على اول ميدالية عالمية.

6- لو انتم فاكرين أن صناعة الأبطال بس محتاجة دعم مادى يبقى وجهة نظرى ما وصلتش

7- أنا بتكلم على التخطيط والإدارة والأهداف وفنيات السباحة.

8- المفروض يكونوا مشغولين بتأسيس منظومة كاملة لمصلحة السباح يطلعوا أجيال قادرة على التنافس العالمي.. هل معقول إن بعد المدة الطويلة وتقريبا 12 سنة ما يكونش فيه طلع أبطال صغيرين لما يكبروا يوصلوا للعالمية؟

9- في ريو كنا 5 سباحين وأنا البنت الوحيدة وطوكيو كنا 4 وأنا البنت برضه الوحيدة، وباريس 2

10- أنا بسافر كتير مع المنتخب وبقابل الناشئين والناشئات وبشوف فيهم مواهب كثير ولكن مفيش أى تخطيط ولا منظومة متكاملة علشان يتحسنوا.

11- رئيس الاتحاد قال امبارح في المداخلة انه كان قدامى 3 سنين علشان أجيب الرقم التأهيلي للسباق والكلام ده غير دقيق لأنى جبت الرقم المؤهل في 2022 ولم يتم احتسابه لأن التأهيل يبدأ قبل الأولمبياد بسنة ونص.

12- ولازم نتعلم من أخطائنا ولازم يكون فيه لجان فنية فاهمة القوانين واللوائح والمواعيد المهمة.

13- أنا مش عايزة حاجة ولا عاوزة أثبت حاجة أنا صعبان على المجهود اللى أنا وغيرى بنبذله على الفاضى ونفسى الجيل الجديد يحققوا ميدالية أولمبية اللى أنا ما عرفتش أحققها.

14- أنا مش داخلة خناقة ومعنديش أى مشكلة شخصية مع أى حد في الاتحاد بالعكس دة إحنا بتربطنا علاقة طويلة في هذا المشوار.

15- رغم حزنی وضیاع مجهودي أنا رفضت أدخل فى أى برامج أو مداخلات قبل الأولمبياد علشان اللاعبين المتأهلين في البعثة المصرية بيبقوا في أمس حاجة للمساندة ومحبتش أسلط الأضواء على المشكلة لأن الموضوع مش شخصی وکلامی دلوقتي هدفه الوحيد إصلاح المنظومة علشان الأجيال اللي جايه.

16- أنا دلوقتي دوري هو محاولة تسليط الضوء على المشكلات الموجودة من أجل أن تتحسن الرياضة المصرية في المطلق لأن مصر تستحق الأفضل.