لايف بصراحة| "إيجار متأخر.. وخدوا الجرانيت".. القصة الكاملة لسيدة تستغيث من هنا الزاهد وأسرتها

تداول رواد مواقع التواصل الاجتماعي عبر “فيسبوك”مقطع فيديو يتضمن اتهام سيدة للفنانة هنا الزاهد وأسرتها، بالنصب عليهم  بسبب تأجير منزلهم بإحدى المجمعات السكنية في مدينة السادس من أكتوبر وسيطرتهم على الفيلا الخاصة بها، قائلة : "مساء الخير أنا بعمل الفيديو ده علشان أحكي حكاية عن أسرة في مصر حطيت شقى عمرها في بيت في كومبوند مشهور في 6 أكتوبر على أساس إنهم بيبنوه وهيسكنوا فيه هو وأولادهم، خلصوا المباني وابتدوا يحضروا إنهم يسكنوا، اضطروا يسافروا برة مصر لأن الزوج جاله شغل، فسافروا قبل ما يسكنوا في المكان".

وأضافت السيدة خلال المقطع عبر “الفيسبوك”، : "في يوم من الأيام جت مكالمة للزوج من سيدة فاضلة اسمها شيرين المنزلاوي قالت إنها عايزة تأجر المكان لأنها شافته وعجبها البيت، ف الزوج اعتذرلها وقالها مش بنفكر نأجر لأن الإيجار بيكون فيه مشاكل وتبعات مش هنقدر نهندلها وفي نفس الوقت مش ضامنين شغلنا اللي برة ده هيخلص امتى وهنحتاج البيت، ومقدرناش نلبي طلبها وخلاص افتكرنا الموضوع خلص".
 

واستكملت: "تاني يوم جاتلنا مكالمة من فنان قدير الله يرحمه طلعت زكريا قال إن شيرين المنزلاوي دي زوجته وهي قالت إن إحنا خايفين نأجر، بس هو بيضمن بضمانته الشخصية إن مش هيحصل مشاكل والحاجات اللي بتحصل في الإيجارات وكدة، وشيرين المنزلاوي عندها بناتها الفنانة هنا الزاهد وفرح الزاهد، بس قال إنهم أسرة وعندهم كارير ومفيش مشكلة كل حاجة على ضمانته الشخصية، ف الأسرة اقتنعت وأجرتلهم البيت".

سيدة تستغيث من أسرة الفنانة هنا الزاهد

وأكملت : "فكانوا عايزين يأجروه لمدة طويلة حوالي 5 سنين، فقولنالهم ظروف شغلنا مش مضمونة وممكن نرجع في أي وقت، فالفنان طلعت زكريا قال إحنا محتاجين نأجره فترة طويلة، ووقت ما ترجعوا بيتكم في الحفظ والصون خدوه، ف يعني فنان قدير ومشهور ومحترم ومحبوب، وحنا اقتنعنا بكلامه، فقولناله 5 سنين أو أكتر كتير، ف ممكن نأجر 3 سنين، فشيرين المنزلاوي مضت عقد بالإيجار لمدة 3 سنين، ويعني سكنوا في البيت وخلاص وابتدوا يدفعوا الإيجار وتمام، ساعات الإيجار يتأخر وتحصل ظروف ويقولوا مثلا الأستاذ طلعت مجالوش شغل، فيأخروا الإيجار شوية معلش أصل الإنسان بيحصله ظروف في أي وقت، إحنا نفسنا حصلتلنا ظروف قبل عقد الإيجار يخلص بسنة فاضطرينا ننزل مصر".

وأوضحت : "فسألناهم زي ما وعدونا يرجعولنا البيت، ف الحقيقة هما رفضوا يرجعولنا البيت زي ما وعدونا، واضطرينا إن احنا نأجر برة ونقولهم إحنا مأجرين برة وده بيتنا ومحتاجين نرجع زي ما وعدتونا، ف إحنا مأجرين أغلى من الإيجار اللي أنتوا بتدفعوه، فسألتنا بكام السيدة شيرين، قولنالها الرقم، قالتلنا إيه الجشع وإيه الطمع ده وقالت ألفاظ أنا أخجل إني أقولها، وقالت إحنا مش خارجين وأعلى ما في خيلكم اركبوه، وبعدين توقفوا عن دفع الإيجار تماما، ف اضطرينا إن احنا نرفع قضية واننا نسترد البيت، ف المحكمة حكمتلنا إنهم يخرجوا من البيت ويدفعولنا لغاية نهاية عقد الإيجار، إحنا طالبنا بالبيت قبل المدة ما تخلص وكان فاضلهم وقت في العقد، ف كانوا توقفوا عن الدفع في فترة، ف المحكمة حكمتلنا باسترداد البيت، يعني في الفترة اللي خدنا فيها الحكم ده كان عقد الإيجار خلص وهما قاعدين سنتين بعد العقد ما خلص في البيت".

أزمة أسرة الفنانة هنا الزاهد

وصرحت : "وخرجوا من البيت بعد كدة مش عايزة أقول إزاي بس كانت فترة عصيبة علينا جدا إنهم يخرجوا، دخلنا البيت لقينا تلفيات رهيبة، يعني مش عايزة أقول إن الأحواض وجرانيت المطبخ اتاخد مش عارفة إزاي، رفعنا قضية تانية بالتلفيات، والقضية راحت المحكمة استئناف ودرجات القضاء خدناها كلها، لأن كل مرة يرفعوا قضية مضادة، بس الحمد لله القضاء نصفنا وادانا حقنا، معانا حكم محكمة من فبراير 2024 مش عارفين ننفذه، مش عارفين نستدل لهم على عنوان لا عن طريق محاميهم ولا عن طريق الوساطة".