أجروا فيلتي ومدفعوش الفلوس.. سيدة تتهـم هنا الزاهد وأسرتها بالنصب

اتهمت سيدة هنا الزاهد وأسرتها، بالنصب بسبب تأجير منزلهم بإحدى المجمعات السكنية بمدينة السادس من أكتوبر وسيطرتهم على الفيلا الخاصة بها.

ونشرت السيدة مقطع فيديو عبر موقع التواصل الاجتماعي “فيسبوك”، قائلة : "مساء الخير أنا بعمل الفيديو ده علشان أحكي حكاية عن أسرة في مصر حطيت شقى عمرها في بيت في كومبوند مشهور في 6 أكتوبر على أساس إنهم بيبنوه وهيسكنوا فيه هو وأولادهم، خلصوا المباني وابتدوا يحضروا إنهم يسكنوا، اضطروا يسافروا برة مصر لأن الزوج جاله شغل، فسافروا قبل ما يسكنوا في المكان".

سيدة تتهـم هنا الزاهد وأسرتها بالنصب 

وأضافت : "في يوم من الأيام جت مكالمة للزوج من سيدة فاضلة اسمها شيرين المنزلاوي قالت إنها عايزة تأجر المكان لأنها شافته وعجبها البيت، ف الزوج اعتذرلها وقالها مش بنفكر نأجر لأن الإيجار بيكون فيه مشاكل وتبعات مش هنقدر نهندلها وفي نفس الوقت مش ضامنين شغلنا اللي برة ده هيخلص امتى وهنحتاج البيت، ومقدرناش نلبي طلبها وخلاص افتكرنا الموضوع خلص".

وتابعت : "تاني يوم جاتلنا مكالمة من فنان قدير الله يرحمه الأستاذ طلعت زكريا قال إن السيدة شيرين المنزلاوي دي زوجته وهي قالت إن إحنا خايفين نأجر، بس هو بيضمن بضمانته الشخصية إن مش هيحصل مشاكل والحاجات اللي بتحصل في الإيجارات وكدة، والسيدة شيرين المنزلاوي عندها بناتها الفنانة هنا الزاهد وفرح الزاهد، بس قال إنهم أسرة وعندهم كارير ومفيش مشكلة كل حاجة على ضمانته الشخصية، ف الأسرة اقتنعت وأجرتلهم البيت".

سيدة تستغيث من والدة هنا الزاهد

وأكملت : "فكانوا عايزين يأجروه لمدة طويلة حوالي 5 سنين، فقولنالهم ظروف شغلنا مش مضمونة وممكن نرجع في أي وقت، فالفنان طلعت زكريا قال إحنا محتاجين نأجره فترة طويلة، ووقت ما ترجعوا بيتكم في الحفظ والصون خدوه، ف يعني فنان قدير ومشهور ومحترم ومحبوب، وحنا اقتنعنا بكلامه، فقولناله 5 سنين أو أكتر كتير، ف ممكن نأجر 3 سنين، ف السيدة شيرين المنزلاوي مضت عقد بالإيجار لمدة 3 سنين، ويعني سكنوا في البيت وخلاص وابتدوا يدفعوا الإيجار وتمام، ساعات الإيجار يتأخر وتحصل ظروف ويقولوا مثلا الأستاذ طلعت مجالوش شغل، فيأخروا الإيجار شوية معلش أصل الإنسان بيحصله ظروف في أي وقت، إحنا نفسنا حصلتلنا ظروف قبل عقد الإيجار يخلص بسنة فاضطرينا ننزل مصر".

وأوضحت : "فسألناهم زي ما وعدونا يرجعولنا البيت، ف الحقيقة هما رفضوا يرجعولنا البيت زي ما وعدونا، واضطرينا إن احنا نأجر برة ونقولهم إحنا مأجرين برة وده بيتنا ومحتاجين نرجع زي ما وعدتونا، ف إحنا مأجرين أغلى من الإيجار اللي أنتوا بتدفعوه، فسألتنا بكام السيدة شيرين، قولنالها الرقم، قالتلنا إيه الجشع وإيه الطمع ده وقالت ألفاظ أنا أخجل إني أقولها، وقالت إحنا مش خارجين وأعلى ما في خيلكم اركبوه، وبعدين توقفوا عن دفع الإيجار تماما، ف اضطرينا إن احنا نرفع قضية واننا نسترد البيت، ف المحكمة حكمتلنا إنهم يخرجوا من البيت ويدفعولنا لغاية نهاية عقد الإيجار، إحنا طالبنا بالبيت قبل المدة ما تخلص وكان فاضلهم وقت في العقد، ف كانوا توقفوا عن الدفع في فترة، ف المحكمة حكمتلنا باسترداد البيت، يعني في الفترة اللي خدنا فيها الحكم ده كان عقد الإيجار خلص وهما قاعدين سنتين بعد العقد ما خلص في البيت".

هنا الزاهد ووالدتها 

وصرحت : "وخرجوا من البيت بعد كدة مش عايزة أقول إزاي بس كانت فترة عصيبة علينا جدا إنهم يخرجوا، دخلنا البيت لقينا تلفيات رهيبة، يعني مش عايزة أقول إن الأحواض وجرانيت المطبخ اتاخد مش عارفة إزاي، رفعنا قضية تانية بالتلفيات، والقضية راحت المحكمة استئناف ودرجات القضاء خدناها كلها، لأن كل مرة يرفعوا قضية مضادة، بس الحمد لله القضاء نصفنا وادانا حقنا، معانا حكم محكمة من فبراير 2024 مش عارفين ننفذه، مش عارفين نستدل لهم على عنوان لا عن طريق محاميهم ولا عن طريق الوساطة".

وقالت : "وإن أثناء ما هما قاعدين في البيت والقضية الأولى شغالة أخو السيدة شيرين المنزلاوي اتصل بينا طالب مننا بيساومنا نديلهم فلوس علشان يخرجوا من البيت، يعني أنا مش عارفة إزاي الفكرة جت في دماغهم، برضه والقضايا شغالة حاولنا نتواصل معاهم عن طريق المخرجة القديرة الأستاذة منى الأبحر إن هما يدفعوا الفلوس اللي عليهم، معرفتش توصل معاهم لنتيجة".

وأضافت : "السيدة شيرين المنزلاوي أهانت زوجي، وأديت التليفون للفنانة هنا الزاهد بتقوله أنت موت أبونا الفنان طلعت زكريا ودلوقتي عايز تموت أمنا، ف أنا مش فاهمة هي إزاي بتقوله كدة وهي عارفة إيه اللي حاصل، وأنا مش فاهمة هو مين المأذي في الموضوع"