«كان زوج مخلص جدا.. لو اتجوزت مش هقدر أخلف».. أبرز تصريحات لقاء سويدان في برنامج «الستات»

حلت الفنانة لقاء سويدان، ضيفة في برنامج «الستات» مع الإعلامية سهير جودة، وتحدثت عن تفاصيل خاصة في حياتها الشخصيةوعن علاقتها بالفنان حسين فهمي.

نستعرض لكم في السطور التالية أبرز تصريحات لقاء سويدان:-

-بعد أقل من أسبوعين هكمل 50 سنة، وأنا عشتهم الحمد لله بالحلو والوحش، أحلى فترة بالنسبة لي هي سن الأربعين.

-لو اتجوزت حد أصغر مني بكتير في حاجات مش هقدر أعملها، مش هقدر أخلف لو هو عايز يخلف، وجسديا في حاجات أكيد هيبقى عنده طاقة فيها وأنا مش نفس الطاقة.

-المشاعر ملهاش سن لكن لازم يبقى في حد معين.

- لما اتجوزت حسين فهمي كان أكبر مني بـ 34 سنة وده فرق كبير جدا ولا أنصح بكده، لكن كانت روحه أحسن من أي شاب عمره 25 أو 35 سنة.

- أنا السنة اللي فاتت عملت جراحة وشيلت أورام ليفية، وبعدها بفترة فضلت تعبانة، وعندي آلام من أكثر من 7 شهور مش عارفة سببها.

- تعبت جدا وأنا بقدم برنامجي واتنقلت بعربية إسعاف، وكالعادة التشخيص كان حاجة بسيطة، وفي المستشفى اكتشفوا إن عندي فتق جراحي من فترة والأمعاء طالعة برا، والعملية استغرقت 5 ساعات.

- لجأت للقضاء علشان آخد حقوقي المادية من حسين فهمي بعد طلاقنا علشان كنت بحاول أثبت إني لو عاوزة آخد حقي هاخده.

- ربنا قال في مهر وفي مؤخر، والمهر من شروط الزواج، وأنا تنازلت بإرادتي وبحب شديد عن كل ده قبل الزواج لإني كنت مش فارقة معايا حاجة غير إني بحبه.

-في واحدة مش هذكرها لأنها أقل من إني أذكرها الرسالة دي موجهة لها بنسبة 50%، وإذا كانت سبب في الطلاق ربنا مش هيسيبها، لكن هي مش حبيبة.

-أنا قلت قبل كده إنه مكانش خاين وكان زوج مخلص جدا، ومكانش في حد غيري في حياته وقت ما كنا متجوزين.