إكرامي الشحات يعلق على انتهاء أزمة رمضان صبحي

علق إكرامي الشحات، لاعب الأهلي السابق، ووالد زوجة رمضان صبحي نجم بيراميدز،، على براءة صبحي في ازمة المنشطات ورفع الإيقاف عنه.

وقال إكرامي، خلال تصريحات تليفزيونية ببرنامج “اللعيب”، عبر قناة”mbc مصر”:” هتكلم بوجه عام في قضيه رمضان، رمضان وأسرته وانا وزوجتي وولادي وشريف وابنه واخوات رمضان وأمه كنا عايشين أسود شهرين في حياتنا رمضان كان بيغتال نفسيا”.

وتابع:” مين هيعوض رمضان عن اللي حصل له؟، اتحرم من المنتخب وخسر ماديا وممكن كان يشارك في الاوليمبياد، كان في اخطاء جسيمه في الاجراءات في قضية رمضان، الخسارة النفسيه والماديه محدش هيعوضها لرمضان والتحطيم المعنوي للاسر دي محدش هيعوضه”.

واضاف إكرامي:” احب اشكر ملاك نادي بيراميدز في الامارات على دعمهم لرمضان، لإنهم كانوا متأكدين من برائته، والادارة هنا وممدوح عيد ودي اول مره اذكره على دعمهم”.

وواصل: “الاعلاميين اللي خاضوا في عرض رمضان سواء عن جهل او معلومه وصلت لهم، اتمنى يكون عندهم الشجاعه ويعتذروا لرمضان”.

وشدد إكرامي:” في جزئيه خاصه بشريف اكرامي، واتقال انه كان موجود بصفته شقيق زوجة رمضان، لا هو كان موجود لانه عارف المعايير الدوليه للمنشطات ولما حصلت له الازمة رفض يكون معه محامي وهو قدم مايثبت برائته واول مرة في تاريخ المنشطات ان لاعب يتهم ويطلع براءه “.

وأشار:” شريف كان موجود لانه كان علي علم ودرس المعايير الدوليه وسهر اسابيع وشهور للدراسة علشان قضية رمضان وكان مع هيئه الدفاع وركن اساسي فيها ووجوده ساعد”.

وأكمل إكرامي:” اشكر لجنة الاستماع لان اول لجنه استمرت9 ساعات واللجنه الثانيه 8 ساعات لكي يرضوا ضميرهم وطلعت، الحالة المعنوية لرمضان محدش يحس به زينا احنا اسرته ووصل لمرحلة صعبه، لكن كان واثق في ربنا وبرائته”.

وزاد: “في ناس كانت بتقول أيادي خفية وراء أزمة رمضان صبحي، ووجهت الاتهام إلى الأهلي، وهذا الكلام عارٍ تمامًا من الصحة، الزج باسم الأهلي في المؤامرة ضد رمضان، النادي الأهلي أكبر من كده بكتير، مينفعش أزج بإسم الأهلي في هذه القضية، الأهلي مش محتاج أنه يدخل في هذه القضية، إذا كان المسؤولين في الأهلي زعلانين إن رمضان مشي من النادي، مش معنى كده إنهم هيحطموه معنويًا ويؤذوه في أكل عيشه”

واستطرد إكرامي:” رجاء من الاعلام يعرفوا ويحصل لهم توعيه ويقرأوا المعايير الدوليه الخاصة بالمنشطات، علشان يكلموا عن معرفه، المطلوب الاعتذار من من اسائوا وخاضوا في عرض رمضان وناس كثيرمن مقدمي البرامج”.

وأختتم: “لما رئيس اتحاد الكرة قال عينه رمضان ايجابيه هل تعلم انها مفيش فيها منشطات وانما عينه فاسدة، هيئه الدفاع عن رمضان بتدرس الامور لكي يحصل على حقه، وبعد مباراة الأهلي هيقعدوا ويدرسوا الامور كلها، هل تفتكر بعد الحب الي رمضان شافه من جمهور الزمالك والاهلي، جريدة قوميه تقول رمضان يتوعد الاهلي”.