مروة صبري تهاجم سمية الخشاب بعد تصريحاتها عن الثانوية العامة: «متطلعش من إنسان طبيعي»

شنت الإعلامية مروة صبري هجوم على الفنانة سمية الخشاب، بسبب تصريحاتها عن الثانوية العامة ونصائحها للطلاب التي قالت فيها أن الشهادة لا أهمية لها الأهم هو الحصول على الأموال.

وقالت مروة صبري في برنامجها «قعدة ستات»:«الناس في الثانوية العامة بتبقى محتاجة تشجيع ودعم اتفاجئنا بالفنانة المحترمة سمية الخشاب في عز الخوف والرعب والطلاب قاعدين بيذاكروا والأهالي بتدفع دم قلبها على الدروس ومرعوبين على أولادهم ونفسهم يجيبوا أعلى المجاميع، بتقولهم ولا تعليم ولا شهادة ولا نيلة اللي معاه فلوس هو اللي هيقدر يصرف على نفسه والشهادة هتعلمها قرطاس طعمية».

وتابعت:«أنا قلت الصفحة بتاعتها اتسرقت أكيد مفيش فنانة مصرية اسمها معروف وعملت بطولات تطلع تقول نصيحة زي دي للطلاب،أي حد مشهور في المجتمع إحنا بنبقى واخدينه قدوة وبنبقى شايفين إنه بيتكلم صح في ناس بتحبه وبتسمعه، إذا بكلمة منك ممكن تدعمي بتوع ثانوية عامة وأهاليهم وبكلمة منك ممكن تحبطي بعض الناس ولكن اعتقد أن مفيش حد ممكن يأثر فيه التصريح اللي إنتي كاتباه لأن دا تصريح ميطلعش من فنانة ولا يطلع من إنسان عايش على وجه الأرض طبيعي».

وأضافت:«إنك تقولي للعيال الغلابة اللي قاعدين بيذاكروا ونفسهم ينجحوا ويعملوا أحسن حاجة والأبهات اللي فلوسهم يا عيني رايحة على الدروس الخصوصية وعايز ابنه أو بنته يبقوا أحسن الناس ويحققوا أحسن النتايج ويدخلوا أحسن الكليات وتطلعي تقوليلي في الآخر هتعملها قرطاس طعمية ولا قرطاس لب دا كلام، للأسف إني اتأكد أن الصفحة بتاعة سمية الخشاب متسرقتش وأن البوست دا هي اللي كاتباه دي من الحاجات الغريبة جدا».

واختتمت مروة صبري حديثها:«متسمعوش كلام سمية الخشاب الشهادة مهمة وبتحدد مصير».