تامر عاشور يدعم أهل شيرين بعد اتهامات حسام حبيب:«ولا كلمة من اللي اتقالت ليها أساس من الصحة»

دافع المطرب تامر عاشور عن أهل الفنانة شيرين عبد الوهاب، ذلك بعد اتهامات حسام حبيب لهم بأنهم سرقوا أموالها، وباعوا حساباتهم على السوشيال ميديا.

كتب تامر عاشور تدوينة على موقع التدوينات القصيرة بموقع التواصل الاجتماعي إكس:«كل اللي أقدر أقوله في موضوع شيرين عبد الوهاب أن مفيش كلمة واحدة بس من اللي اتقالت وانتشرت صح.. أنا قريب من أهل شيرين ووالدتها وأخوها،أنا برضه أقولها إني بحبها وكل الدنيا بتحبها وتحب فنها.. أهل شيرين مظهروش في حياتها آخر سنتين تلاتة.. أهل شيرين هم أهل شيرين من زمان، كل نجاحات شيرين كانت وسط أهلها وناسها اللي يشيلوها من على الأرض شيل».

أضاف عاشور حديثه:«يا رب يبعد عنها كل خبيث وأناني وفاشل وممثل.. هي أطيب منهم كلهم وهم اللي وقعوها فكل مشاكلها (أنت بمن حولك) لو اللي حواليك فشلة غصب عنك لازم تبقى زيهم وتعافر علشان تقدر تمارس اللي كنت بتعمله في عدم وجودهم بمنتهى السهولة».

اختتم تامر عاشور حديثه:«أنا كلت عيش وملح في بيتها وفي بيت أمها وأخوها وكان لازم أقول الكلام ده علشان الكلام ده هو الكلام الحقيقي ولا كلمة من اللي اتقالت واتسمعت ليها أساس من الصحة.. أهل شيرين هم هم أهل شيرين من زمان قوي.. بالعقل».

أثيرت حالة من الجدل خلال الساعات الماضية، بعدما سُربت إحدى التسجيلات الصوتية أو محادثة هاتفية للفنان حسام حبيب، يهاجم فيها أسرة طليقته شيرين عبد الوهاب ويتهم شقيقها محمد ببيع وسائل التواصل الاجتماعي الخاصة بها.

بدأت الحكاية بتسريب صوتي لحسام حبيب تم تداوله عبر السوشيال ميديا، وصف خلاله أهل شيرين بالظالمين وبكونه لا يتشرف بأن يكونوا من أهله. موضحا أن ألبوم شيرين مُعطل بسبب ما تُعانيه من مشكلات مع أهلها.

أوضح حسام في المقطع الصوتي المسرب، أن أهل شيرين استولوا على بيتها وأموالها، مشيرا إلى أن شقيقها تعدى عليها في غرفة نومها من قبل، كما أنها تتعرض لتهديدات متواصلة منه، بالإضافة إلى بيعه للسوشيال ميديا الخاصة بشيرين.

أكد أن على جمهور شيرين الصبر حتى تعود إليهم بسبب ما تتعرض إليه من ضغوطات.