نزل يجري والزبونة صوتت بعد ما خبطه.. شهادة جديدة لسائق تكشف تفاصيل صادمة في واقعة دهس عصام صاصا لشاب على الطريق الدائري

شهادة جديدة نشرتها زوجة مطرب المهرجانات عصام صاصا عبرحسابها على انستجرام، المتهم بدهس شاب على الطريق الدائري، تكشف تفاصيل جديدة في الحادثة.

الشهادة التي نشرتها زوجة المطرب عصام صاصا عبارة عن محادثات على تطبيق الواتس آب تعود لمالك السيارة ماركة جيلي التي اعترف مطرب المهرجانات عصام صاصا أنها كانت تمر بجانبه أثناء وقوع الحادث.

وقال مالك السيارة : أنا صاحب العربية الجيلي اللي كانت جنب عصام، وأقسم بالله يا ابن الحلال ما خبطوا جنب الرصيف زي ما بيقولوا، خبطوا في الحارة التانية أو التالتة وكل فضل يقول إنها كانت الساعة 7 الصبح وفي النور، الكلام ده كان الساعة 5 وكسور في عز الضلمة، وأنا أصلا كنت مهدي علشان الرادار، وبعدها كنت نازل مريوطية، وكنت تالت حارة.

وتابع مالك السيارة والشاهد على الواقعة "بقلب رعاش لقيت الراجل قدام يدوب حدفت شمال راح عداني، راح العربية اللي جمبي جت شالته الله يرحمه، أقسم بالله ولا أعرف إنه عصام ولا حاجة، خبطه ونزل وممشيش عقبال ما وقف كنت أنا لميت يمين ونزلت أدور على الراجل لقيته جنب الرصيف، وعصام صاصا جي بيجري عليا ومكنش في غير أنا وهو الزبونة اللي في العربية وقعدت تصوّت.

وادعى مالك السيارة "عصام جالي عمال يقولي والله ما قصدي أخبطه، قُلت له الراجل مات يا أخويا وأنا وهوه واقفين مفيش أعصاب وجاتله حالة هيستيريا، روحت جبت الفرش من عربيتي روحت مغطيه وأقسم بالله ما في راجل شاف منظر الراجل ولا حتى لما الإسعاف جات، علشان هما شالوه بالفرش على طول، وأقسم بالله أنا ما بنام بسبب الحوار ده والتفكير ومش علشان عصام بس قسما بالله لولا ربنا سترها معايا أنا كنت هكون مكانه.