مها أحمد: مرض ابني بسبب خطأ طبي وربنا وعدني هجوزه في الجنة واسمع منه كلمة «ماما»

علقت الفنانة مها أحمد على لأول مرة على مرض نجلها من ذوي الهمم قائلة: "انا عندي أحمد ابني من ذوي الهمم، وبدخل أفك الهدايا اللي بكسبها وأطلعها لذوي الهمم بس مش لازم أقول كده". 

مها أحمد: مرض ابني بسبب خطأ طبي ومش من عند ربنا 

وقالت مها أحمد خلال استضافتها ببرنامج «أسرار» مع الإعلامية أميرة بدر المذاع على قناة النهار: «أحمد ابني من ذوي الهمم، والسبب في اللي حصله كان دكتور عمل خطأ طبي، ومقاضيتش الدكتور لأنه مش هيرجعلي مخ ابني لأنه نقص اكسجين، والسبب وانا بولد ان الدكتور شده بالشفاط، وبعدها خرجني ولدت في اوضة قيصري، ولو كنت قلت ساعتها عمرهم ما هيقولوا الحقيقة اللي حصلت جوه أوضة العمليات، وهو بالنسبالي الحياة وممكن ربنا يكون عمل كده عشان ادخل الجنه أنا وجوزي من غير ما نتعب في الدنيا».

وأضافت مها أحمد قائلة: «ابني لحد دلوقتي تعبه متعة وراحة بالنسبالي، أنا مش بعيط عشان أحمد كده، ولكن أحمد مالوش ذنب في كده، انا لما كان ابني بيرجّع كنت بدوق الترجيع، عشان طريقة الدواء كده فا بدوق عشان اعرف ده الدوا ولا لأ لان دي سموم».

وتابعت مها أحمد قائلة: «وأنا نازلة لازم احكيله ولو ضحك بعرف إن كده الموضوع اللي رايحة اعمله هيمشي، وأنا أي مكان بروحه باخده معايا ومجدي جوزي بيروح يشوف مكان مناسب عشان يبقى ينام فيه، واللي الناس متعرفوش إنى كل سنة بدخل بيه المستشفى عشان عنده نقص حديد ومحدش يعرف حاجة غير أهلي، وعمري ما طلبت لا من النقابة ولا اي حد فلوس، ولا سعيت اني اجيبله معاش زي ما سيادة الرئيس عامل للأطفال ذوي الهمم، ولو بتاجر بابني كان زماني في كل بلد شوية».

مها أحمد: ربنا وعدني هجوز ابني في الجنة واسمع منه "ماما"

وأضافت مها أحمد قائلة: «هفضل اشتغل ع تيك توك، ولو جالي شغل في منصة هشتغل، وانا دخلت الجنة وأنا في الدنيا، مش بعيط عشان اللي حصل لابني ولا أنه معيوب، لو من عند ربنا عادي لكن لما يبقى خطأ طبي ده اللي بيزعل، وانا في الجنة هسمع منه ياماما وهجوزه في الجنة وربنا واعدنا في كده، ولكل ام ابنا كده اصبري هتشوفي هيبقى ازاي في الجنة».