علا غانم تهاجم طارق الشناوي: مش من حقك تصنفنا كفنانين وأنا بالتحديد محدش يصنفني |خاص

أعربت الفنانة علا غانم عن استيائها الشديد من انتقاد النقاد الفني طارق الشناوي لأولاد فيلم "أولاد حريم كريم"، الذي عرض مؤخرًا في دور العرض بجميع سينمات مصر.

وقالت علا غانم خلال لقائها مع "بصراحة": طارق الشناوي منتقدتش الفيلم بس ده هاجمنا احنا شخصيًا، وتصنيفه غير مقبول أنت مش من حقك تصنفنا كفنانين وأنا بالتحديد محدش يصنفني الجمهور عارف علا غانم كويس .

علا غانم ترد على طارق الشناوي

وأضافت: احنا في 2010 قولنا الدنيا هتتصلح والأمور هترجع طبيعية من جديد بعد 2013 لكن للأسف ده محصلش وبقينا عناف أوي مع بعضينا ومش عارفين نختار ألفاظنا ومش رحماء على بعض، أنت ممكن تخش في خناقة مع أخوك وتنسوها تاني يوم لو مفيهاش لفظ جارح، ونفس الخناقة ممكن يبقى فيها كلمة جارحة منسهاش طول العمر.

وواصلت: أنا بني آدم بحاول انتقى الفاظي عشان محبش حد يكون شايل مني وأكون غليظة القلب واللسان، واي مجتمع سوي هيطلب ميكنش فيه جرح.

هجوم طارق الشناوي

وكان قد هاجم الناقد الفني طارق الشناوي، الفنان مصطفى قمر وأبطال فيلم "أولاد حريم كريم"، وقال خلال لقاه مع "et" بالعربي: من أسوأ الأعمال الفنية على الرغم من أن مخرجه علي إدريس مخرج مهم وزينب عزيز كاتبة مهمة ولكن اللى عملوه ملهوش علاقة بالجزء الأول، ولا فين السينما اللي بنعيشه دلوقتي وتراجع لزمن ما قبل الجزء الأول.

وأضاف: المطرب بيتعمل له أفلام ازاي نرجع لأم كلثوم لما بتنجح بيتعملها فيلم، وعبد الحليم حافظ لما عمل أغنية على قد الشوق فاتعمله فيلم مع شادية لإنه كان ناجح كمطرب، ولما بتفشل كمطرب مش هتصعدك السينما والسينما بتروح للبريق مش هي اللي بتعطيك بريق، مصطفى قمر في عز فشله كمطرب قرر أنه يعمل الفيلم واللى اشتغل معاه الجزء الثاني الحريم اللى مش مطلوبين أوي في السينما.

أبطال حريم كريم 2

جديرًا بالذكر شارك في فيلم "أولاد حريم كريم"، العديد من نجوم الفن أبرزهم: "مصطفى قمر، داليا البحيري، بسمة، علا غانم، خالد سرحان، ومع نجوم "أولاد حريم كريم" عمرو عبد الجليل وبشري".