فيديو.. الباجوري عن دور باسم سمرة في سفاح الجيزة: "السوشيال ميديا مسكت الكورباج ودبحته"

علق المخرج هادي الباجوري، على انتقادات البعض له بسبب إسناد دور ضابط الشرطة في مسلسل"سفاح الجيزة" للفنان باسم سمرة.

وقال الباجوري، خلال مداخلة هاتفية ببرنامج "تفاعلكم"، على قناة "العربية" :" الجمهور متعود على صورة نمطية للممثل الذي يظهر في هذا الدور".

وتابع:" الجمهور بيحب يتفرج على الحاجة اللي إتعود عليها، ولما تديله حاجة جديدة بياخد وقت علشان يتقبلها"، متسائلا:" ليه باسم مايبقاش ضابط؟ هل مشكلتهم إنه دايما كان بيعمل دور بلطجي؟ والضابط في مصر من كل أنحاء الجمهورية، وممكن يتكلم بلهجة فلاحي".

وأكد المخرج أن الفنان باسم سمرة ممثل شاطر جدا، وأي دور بيقدمه بيكون مظبوط، واعتقد الجمهور كان في البداية مخطوف، لكن بعد ما شافوا دوره وعلاقته بابنه شافوا إنه أتقن الدور جدا.

هادي الباجوري وباسم سمرة

وأشار الباجوري إلى أن مسلسل الاختيار الضابط سواء أمير كرارة أو عمر يوسف كان له شكل معين، لكن انا بحب اطلع خارج المألوف، معلقا:"مش لازم أدي المتفرج كل اللي يتوقعه".

وعن انتقادات الجمهور لدور باسم سمرة، :"الجمهور بتاعنا بيبقى ماسك كورباج، يعني داليا في أول 4 حلقات كانوا الناس طايرين بيها وبيشكروا فيها، ولما عملت مشهد حسوا انها بالغت في تقديمه ومسكوا بقى الكورباج والسكينة ودبحوها، يعني مفروض تعمل ايه واحدة متجوزة بقالها 4 سنين وتعرف أن جوزها قاتل 9 وخطف اختها كمان، رد فعل أي حد هيكون ايه؟.

وهاجم الباجوري السوشيال ميديا، :"السوشيال ميديا بقيت مبالغة وقاعدين للناس على الواحدة، ولو البنت بلغت في المشهد انا مسئول عن ده وأنا كان ممكن اقولها تهدى بس انا مقتنع بأدائها وشايف انها ممثلة شاطرة".

واستكمل:"انا مبيفرقش معايا تعليقات السوشيال ميديا، حتى لو مدح انا بشوف العمل من وجه نظري بس، اكيد لازم يكون في آراء مختلفة مينفعش كلنا نتفق على حاجة واحدة لان مستحيل ترضي كل الناس".