المانجاية بـ 70 جنيه وإزازة المياه بـ 200.. أسعار الساحل الشمالي تغضب السوشيال ميديا

تداول نشطاء السوشيال ميديا، مقطع فيديو لرجل يتحدث عن أسعار الساحل الشمالي، حيث ظهر شاب يروي موقف حدث له في الساحل الشمالي بسبب الأسعار.

وقال الشاب، خلال مقطع الفيديو، :"راجل عسل ضحك عليا أهو واداني مانجاية واحدة بـ 70 جنيه، قولت اشتري فاكهة وانا قاعد على الشاطئ، وجيت ادفع تمن المانجاية قالي 70 جنيه".

المانجاية الواحدة بـ70 جنيه في الساحل الشمالي

توالت تعليقات النشطاء على مقطع الفيديو، :"يعني ازازة المياة بـ 100 جنيه ودلوقتي المانجاية الواحدة بـ 70 طب إزاي، ليه الأسعار في الساحل هناك كده ايه الفرق بين المانجا دي والمانجا العادية اللي الكيلو منها بـ 30 و40 جنيه".

جوري بكر: في أقلة أدب في أسعار الساحل الشمالي

شاركت الفنانة جوري بكر، سابقا تجربتها مع أسعار الساحل الشمالي، وقالت خلال مقطع فيديو اثارت به الجدل على السوشيال ميديا:" في قلة أدب في الأسعار في الساحل الشمالي،أنا بكره الساحل أو بمعني صحيح اللي بيحصل في الساحل الشمالي، ومتضايقة جدا، ولولا ان جوزي بيحب يروح هناك مكنتش جيت خالص، عشان الناس اللي بتقولي وليه بتروحي طالما بتكرهيه".

جوري بكر: ليه إزازة المياه بـ 200 جنيه

وتابعت:"انا راضية الحمد لله بس بجد ليه الأسعار كده يعني، التجار هناك بيسرقوا الناس حرفيا، واحد رايح يتبسط يومين تلاته يلاقي نفسه اتخرب بيته، يعني ايه عيل صغير يروح يجيب إزازة مياه يلاقيها بـ 200 جنيه ليه ميه من الجنه مثلا ولا ايه".

وفي السياق ذاته، انتقد الإعلامي تامر أمين، أسعار الساحل الشمالي، قائلا:"قرص الطعمية بـ 700 جنيه، الناس راحوا الساحل صرفوا مرتبات العيد والشهر لسه مخلصش، وليه اروح اشتري أرورة مياه الاقيها بـ 180 جنيه يعني

كما هاجمت المحامية نهاد أبو القمصان، أسعار المنتجات في الساحل الشمالي، وقالت:"اصحابي عزموني وجيت ابص في المنيو لقيت كوباية الشاي بـ 150 جنيه ليه يعني مش فاهمة، كنت عايزة اشرب شاي بلبن والله خفت يكون بـ 300 ولا 500".