خاص| كسروا مناخيري وسرقوا محتويات العربية.. فتاة تروي تفاصيل تعدي بلطجية عليها في مارينا

تعرضت فتاة شابة للاعتداء على يد مجموعة من البلطجية، وقاموا بسرقة محتويات سيارتها مع تكسيرها بشكل كامل، وذلك في منطقة بورتو جولف مارينا.
وقالت الفتاة خلال تصريح خاص لموقع “بصراحة الإخباري”، :"احنا كنا في مراسي واتفاجئنا بتليفون من حد من الجيران بيقول الحقوا في بلطجية بيكسروا العربية بتاعتكم".

واستكملت: "رجعنا بسرعة وسالتهم بتعملوا ليه كده، قالوا مزاجنا واحنا اللي عملنا كده واللي عندكم اعملوه، حاولت اصورهم لكن واحد منهم خبطني من النظارة ومناخيري اتكسرت، وخد تليفوني، بعدها اتصلت على النجدة ووصلوا".

وأضافت :" الرجالة كانوا 10 هربوا كلهم وبقى معانا الستات بس، روحنا القسم ووجهت ليهم تهمة السرقة وتكسير العربية، وهما كمان اتهمونا وحطوا اسم والدتي عشان هي كبيرة في السن وعايزين يبهدلونا، وكانوا كل شوية يقولنا احنا مسنودين وواصلين اوي ومحدش هيقدر يساعدكم".

وتابعت:"انا كنت أول مرة ادخل قسم وفعلا خفت اوي على والدتي مش على نفسي وبعدها الضابط قالي تحبي تتنازلوا قولتله والحاجة اللي خدوها قالي كله هيرجع".

وتابعت: "لما خرجنا من القسم طلبت منها تسلملي التليفون والحاجات، رفضت وقالت مش هتشوفي حاجة واحنا دافعين للأمن 50 الف جنيه ومحدش هيقف جنبك خالص".

واختتمت :" رجعنا البيت ولقينا الجيران نزلوا لينا صور كل حاجة حصلت والحمد لله انهم عملوا كده وهقدم محضر تاني بالصور والفيديوهات اللي استلمتهم منهم".