الفنانة ميران عبد الوارث: وصلت بموهبتي مش ابناء عاملين

كشفت الفنانة الشابة ميران عبد الوارث عن كواليس بداية مشوارها الفني وردود أفعال الجمهور حول دخولها المجال من خلال والدها الفنان الراحل أحمد عبد الوارث قائلة: كان عندي الفرصة أوصل من خلال بابا بس مش دا اللي حصل.

وتابعت ميران عبد الوارث خلال استضافتها في برنامج فيس أوف والذي تقدمه الإعلامية سارة نخلة على قناة هي قائلة: "كان عندي نوع من العند والاصرار اني اوصل بموهبتي مش بأني بنت فلان والناس متخيلة ان ابناء العاملين هما اللي بيشتغلوا بس عايزة اقولهم ان اللي بيسعى واللي عايز يوصل لحاجة بيوصلها ولما بيتعرف اني بنته دا شئ بيشرفني و بيبقى في نوع من التقدير وبيبصولي بنظرة مختلفة".

كما روت عن رأي والدها في الوسط الفني قبل رحيله قائلة: "بابا مكنش معارض اني امثل ولكن كان عنده شوية تحفظات لأنه فاهم المجال وعارف طبعي وكان دايما بيقولي بخاف انك متعرفيش تتعاملي بس كان شايف اني فيا عناصر الفنانة وكان عايزني اكتشفها لوحدي ودا فعلا حصل".

وعن بداية اكتشافها لموهبتها: "اكتشفت موهبتي في الجامعة في مسرح الجامعة ومكنتش عايزة أمثل في البداية كنت شخص انطوائي وبيتكسف جدا وعمري ماكنت بشوف بابا واحس اني عايزة ابقى زيه".