هاني محروس لـ«بصراحة» بعد ظهور مطربي أغنية سطلانة مع صاحبة السعادة: مقدروش صُناعها

أعرب المنتج هاني محروس عن استيائه الشديد من مطربي أغنية سطلانة لعدم ذكرهم أسماء صناعها خلال استضافتهم في برنامج “صاحبة السعادة”.

وقال هاني محروس في تصريح خاص لـ"بصراحة": اضايقت عشان هما مش صُناع هما مطربين غنوا الأغنية، لما يطلعوا في برنامج زي صاحبة السعادة ويهمشوا المبدعين يبقى أزعل، وغلط أن المبدعين يبقوا مخفيين عن الجمهور، لما مصر والوطن العربي والغربي يغنوا أغنية بتعمل مود حلو وتعمل سعادة للناس مينفعش نهمش اللي عملوها.

واضاف: مش هاخد ضدهم إجراء دول أخواتي بس كان لازم يشكرونا ويقولوا كلمة حلوة، عشان الكلمة الحلوة للمبدعين اللي زينا بيخليهم يكملوا دي الطاقة اللي إحنا بناخدها وبنعمل أغاني أجدد واقوى، بس لما حد يسقفلك بعد النجاح بتسناها عشان تكمل، كل كلمة حلوة بتتقال بترفع معنوياتك، ولما حد يهمشك بتزعل، الفكرة أن إحنا لما بنطلع المفروض نقدر بعض هي دي القصة.

مطربيين أغنية سطلانة

حل كل من عبد الباسط حمودة وحمدى بتشان ومحمود الليثى وحسن الخلعى، صناع أغنية سطلانة ضيوفًا ببرنامج “صاحبة السعادة”، التي تقدمه الإعلامية إسعاد يونس، عبر فضائية MBC.

وقال محمود الليثى: مبدأيا إحنا الأربعة هنغنى في فرح طاهر محمد طاهر ببلاش؛ لأن الصراحة وشه حلو علينا البداية لما الأهلى كسب الوداد وبعد ما المباراة خلصت واللاعبين خارجين من المدرج وحسين الشحات ماسك الموبايل وطاهر حاطط السماعة وضغط على أى أغنية في البلاى ليست فكانت أغنية سطلانة.

وأضاف: حنا نمنا وصحينا تانى يوم لقينا الأغنية مكسرة الدنيا، وزادت حلاوة لما لقينا منتخب الأوليمبى غناها ونويل رقص عليها، وكمان الأطفال في مدرسة كرم القدم في ريال مدريد غنوها ومانشستر يونايتد.

وواصل: أنا عملت أغانى كتير ناجحة في حياتى، ولكن أغنية سطلانة هي نجاح مختلف من بعد أغنية الأساتوك وحسستنى إنى بأبدأ من أول وجديد، وإدتنى إحساس بالنجاح جامد جدا وجميل؛ لأن النجاح ده بيرضى النفس وبيكون في حافز على إن الشخص يبدأ من تانى.