خلال ندوة صحفية بموقع بصراحة| محمد هاني يكشف كواليس ظهور «البيت بيتك» أشهر برنامج توك شو في مصر

قال الكاتب الصحفي الكبير محمد هاني، إن فكرة برنامج "البيت بيتك" جاءت في عام 2004 بعد تولي ممدوح البلتاجي وزارة الإعلام.

وأضاف محمد هاني خلال ندوة خاصة بموقع بصراحة الاخباري: "أول ما ممدوح البلتاجي مسك المنصب حب يكون في تجربة جديدة في التلفزيون المصري يشوفه الجماهير ويبقى مؤثر وحجر أساس يتبنى عليه التطوير لأشياء آخرى".

وواصل: "كان عامل حملة تروجية الـ Slogan بتاعها :"مصر البيت بيتك"، فهو اللي اقترح الاسم، والفكرة كان أنه يتعمل في شهر رمضان، وهو بيتفرج على القنوات العربية، كان بيلفت انتباها البرنامج اللي بيقدمه عمرو أديب في القاهرة اليوم، فالدكتور ممدوح شد انتباها شكل كمان الاستديو، والتلفزيون المصري كمان مكنش عاجبه شكل الديكور، فقال مين عامل ديكور القاهرة اليوم قالوا محمود بركة، وكان وقتها من ألمع الأسماء فقابله وقاله أنا عايز أعمل برنامج في التلفزيون اسمه البيت بيتك، وعايز أخلي شكله كده".

وتابع: "التلفزيون مكنش هينتج الموضوع ده فقالوا أنت هتنتج البرنامج ده واحنا مش هندفع فيه حاجة، ولما يبقى فيه اعلانات نبقى ندفع، فهو كان بيطلع على الهوا لأنه كان قطاع خاص، فالمهندس بركة كلم عمرو خفاجي، فقاله مفيش غير محمد هاني فكلمني روحتله كان موجود المخرج محمد ياسين ودينا كريم، فهذا الرباعي عمل البيت بيتك".

وأختتم محمد هاني قائلًا:" عملنا البرنامج في رمضان الأول وكل النجوم حضروا، عمل نجاح كبير وغير شكل الشاشة، والبرنامج تحول ليومي واتنقل على القناة التانية فجه الأستاذ أنس الفقي 2005 تبنى البرنامج وأداله دعم كبيرة ومساندة كبيرة معنويًا فاتطور البرنامج وفضل لـ 2010، وكان أفضل البرامج مشاهدة وتأثيرًا".

ويعد الكاتب الصحفى والإعلامى محمد هانى واحد من صناع الإعلام فى مصر والعالم العربى ، حيث ترأس عدد كبير من البرامج التليفزيونية أبرزها برنامج البيت بيتك ، كما أسس وتولى إدارة قناة cbc، ونجح خلال تواجده فى تحقيق انتشار واسع ونجاح.