ياسمين عز عن مزايا الزوجة موظفة البنك: بطنها مشفوط وكتفها مفرود ورقبتها عمود

عددت الإعلامية ياسمين عز مزايا الارتباط بموظفة البنك خلال فترة الخطوبة وبعد الزواج، وذلك بعد تشجيعها متابعي برنامجها في حلقة سابقة على الارتباط بالمدرسة والمهندسة.

وقالت ياسمين عز خلال تقديمها برنامج "كلام الناس" المذاع عبر قناة MBC مصر: "يا بختك ويا سعدك لو إتجوزت موظفة بنك، لازم تعرف إنك إتجوزت الشياكة والأناقة كلها في اللبس والشعر والمكياج، كل حاجة مظبوطة بالشعرة، وهتحس إنك متجوز سوبر موديل".

موظفة البنك

وأضافت: "ميزة مهمة جدا في موظفة البنك إنها الوحيدة اللي مش بتتخن، مهما تفوت السنين تلاقيها دايما محافظة على رشاقتها، بطنها مشفوط وكتفها مفرود وظهرها مشدود ورقبتها عمود".

وأشارت ياسمين عز إلى ميزة انضباط مواعيد موظفي البنوك بقولها: "تظبط المنبه على مواعيد دخولها وخروجها، وعمرها ما تتأخر عليك في تحضير الغدا أو أي حاجة".

وتابعت: "مراتك موظفة البنك صوتها واطي دايما بحكم احتكاكها بالعملاء، وإنت أهم عميل في حياتها، ودايما رضاك مهمتها الأساسية".

كما لفتت ياسمين عز إلى خبرات موظفة البنك في ضبط الميزانية قائلة: "مراتك موظفة البنك أحسن واحدة تظبط لك ميزانية البيت، وعمرها ما تقول الفلوس مش كفاية، غير إنها كسيبة وتلاقيها متحملة كل مصاريفها الشخصية، وقلبها لك خزانة خاصة مقفولة يدخلها واحد بس".

واختتمت قائلة: "هتلاقيها دايما بتتعامل معاك بمبدأ نحن نحافظ على سرية بياناتك، وأنت بتدخل باسوورد موبايلك تلاقيها دورت وشها الناحية الثانية".

كما حرصت الإعلامية ياسمين عزعلى توجيه عدد من النصائح الجديدة لزوجات الزملكاوية خلال حلقة برنامجها “كلام الناس” الذي يعرض على شاشة “إم بي سي مصر”، وذلك بعد فوز النادي الأهلي في مباراة القمة 126.

وقالت ياسمين عز: الفراعين الأهلاوية طبعا مبسوطين، ومداماتهم اللي بيطلبوه بيلاقوه، ومش محتاجين نصائح مني فكل الأمور مستنية ومستقرة.

وأضافت: أما الفرعون الزمالكاوي الله يكون في عونه، الراجل شايل فوق طاقته، ومحتاج معاملة خاصة في الظروف اللي زي دي.

وتابعت: يا مدام فرعونك الزملكاوي منذ بداية الموسم عنده أزمة ثقة كبيرة جدا في أقرب الناس إليه، وخانته ثقته في كل أحبابه، وهذا ناتج عن إن لاعبين من فريقه تركوه وانضموا لفرق منافسة، لهذا بلاش تقفي له على الواحدة، وانتي عارفة أن ما يحدث فترة وهتعدي لأنه سكاكين في ظهره من كل جانب.