بيومي فؤاد: عمري ما غلطت ولا قليت أدبي على جماهير الزمالك أنا ربنا خلقني أهلاوي

كشف الفنان بيومي فؤاد حقيقة هجومه على نادي الزمالك، مشيرًا إلى أنه ولد أهلاوي ولم ينتقد القلعة البيضاء في أي شئ.

وقال بيومي فؤاد خلال مداخلة هاتفية ببرنامج “حضرة المواطن” الذي يقدمه الكاتب الصحفي سيد علي بقناة “الحدث اليوم”: "عمري ما غلطت ولا قليت أدبي على جماهير الزمالك، أنا ربنا خلقني أهلاوي إيه المشكلة، الزمالك لو اتغلب من ريال مدريد هيدوروا على أي حاجة غير إنهم وحشين"

بيومي فؤاد يكشف حقيقه هجومه على الزمالك

وأضاف بيومي: "شيكابالا قال لعمرو أديب لو كورة هناخد الدوري، يعني إيه كورة هو احنا بنلعب بلي، امتى هتقولوا إنكم اتغلبتوا النهارده علشان وحشين أو اللي قدامكم كانوا كويسين".

وأكمل حديثه قائلًا: "لما الزمالك خد كأس مصر من الأهلي قلت على الأهلي دا احنا غلابة النهارده ووحشين، هما لما يخسروا بيعلقوا شماعات ومبررات الخسارة منها الظلم والتحكيم والمؤامرات والسحر، الزمالك بيتجامل والأهلي بيتجامل الزمالك بيتظلم والأهلي بيتظلم، ولكن هناك أمور أخرى وراء الخسارة لا بدَّ على الزمالك الوقوف أمامها والاعتراف بالتقصير والخلل والمشاكل بعيدًا عن الشماعات".

بيومي فؤاد: أنا مولود أهلاوي

وتابع: "إيشمعنى احنا كلامنا اللي بيبقى مر ولو الزملكاوي شتم وقل أدبه يبقى كويس، الزملكاوي بيقول لو كرة زيزو دخلت طيب ما كرة أفشة جت في العارضة، ده ماتش 6/1 بيقولوا لو كورة وليد صلاح عبد اللطيف دخلت كان الزمالك كسب، هو ده كلام يعقل".

وأضاف: "كنت خايف من ماتش بيراميدز بتاع نهائي السوبر وكنت خايف من ماتش الزمالك اللي فات لأن الزمالك ما عندهوش حاجة يخسرها والأهلي خلص الدوري، وده كان هيخليهم أهدأ أعصابًا ولكن نزلوا أعصابهم بتغلي ودا سبب خسارتهم بجانب أن الفريق محتاج لعيبة كتير".