مي كساب: مكنتش حابة أكون ممثلة.. والظروف ظلمتني في الغناء

كشفت الفنانة مي كساب أسرار عن حياتها الشخصية والفنية وبدايتها، بجانب كواليس ابتعادها عن الغناء، قائلة: «الظروف مخدمتنيش في الغناء».

قالت مي كساب في تصريحات تلفزيونية لها: «اللي عارفين يكملوا من جيلي لازم الجمهور يتأكد إن دي اجتهادات فردية منهم، وكل شركات الموسيقى مبقوش يشتغلوا، حتى المنتج نصر محروس مبقاش يشتغل زي الأول.. أنا قررت وقت ثورة 25 يناير أني مش هشتغل تاني لايف، وجابوني في مسلسل تامر وشوقية من أغنية شيل ده من ده».

مي كساب: أحمد مكي والفيشاوي هما اللي اختاروني في تامر وشوقية

وتابعت: «مكنتش عايزة أكون ممثلة وأحمد الفيشاوي ومكي هما اللي اختاروني في تامر وشوقية، ودخلت مجال التمثيل عشان أرضي والدي وهو كان شايفني خليفة شادية، وعادل إمام كان حاببني في فيلم بوبوس».

واستكملت مي كساب حديثها عن تعاونها مع الزعيم عادل إمام: «كنت 24 ساعة معاه وهو أبو الكوميديا، واتعلمت منه أقول الإفيه أمتى وإزاي ويسرا ست عظيمة قدرت تواكب كل جيل، اتعلمت منها إنسانيًا وبتجبر بخاطر كل الناس اللي حواليها وهي مثال للنجم الحقيقي».

وقالت أيضًا: «فيلم شمال يا دنيا عملته عشان محتاجة فلوس وهناك أعمال قدمتها عشان الفلوس بعد ثورة يناير ولما قالولي مش هينزل في السينما كنت في قمة سعادتي، وفيلم 8% بيحكي عن المهرجانات ودخلت العمل ده عشان أعرف عالم المهرجانات، وخرجت من الفيلم ده الناس كلها بتجري ورايا في السينمات وكانت شخصية أزعرينا قالبه الدنيا، ومش ندمانة على دوري في الفيلم مهما كانت عيوبه».