تامر أمين عن صرف مرتب العيد: الناس اكتشفت امبارح إن الفلوس المفروض تكفيهم لنهاية شهر 7 مش 6

قال الإعلامي تامر أمين إن إجازة عيد الأضحى المبارك هذا العام كان بها شيئًا مختلفًا، معقبًا: «العيد السنة دي فيه حاجة غلط، مش بتكلم عن الدين، مليش علاقة بالدين، أنا بتكلم على فكرة الإجازة، كانت مختلفة، وإحساس الناس بيها مختلف السنادي».

وأضاف «أمين»، خلال تقديمه برنامج «آخر النهار» المعروض عبر فضائية «النهار»، اليوم الإثنين: «الإجازة كانت مختلفة، وإحساس الناس بالإجازة كان مختلف، حتى الناس اللي سافرت... فيه حاجة غلط ومش مفهومة، مش عارف إيه هي».

وأوضح: «يمكن الإحساس ده غالب أكثر عند الرجالة، تحس إنها إجازة بالعافية، أو إنك لازم تسافر بس مش عايز تسافر أو مش قادر تسافر، في حاجة مش مفهومة بس الحمد لله كل حاجة بتعدي».

وتابع ساخرًا: «المشكلة الأساسية عند معظم الناس اللي قبضوا فلوس الشهر قبل العيد، وصرفوها في العيد، وطبعا إنتوا عارفين إزازة المياه في الساحل بـ 180 جنيها، وقرص الطعمية بـ 700 جنيه».

وأكمل «أمين»: «الناس اكتشفت إمبارح إن الفلوس دي كانت مفروض تكفيهم لنهاية شهر 7 مش 6، فاضل 28 يوما في شهر يوليو، الذكي هو اللي مسك إيده في العيد عشان يعرف يكمل لنهاية الشهر».