ربنا هيسامحني.. غادة إبراهيم تثير الجدل بتصريحات جريئة في برنامج تابوو: رضا الزوج من رضا الرب.. ومقبلش جوزي يلبس شفاف 

كشفت الفنانة غادة إبراهيم عن تفاصيل جديدة عن حياتها الشخصية، لافتةً إلى أنها أدت العمرة من وقت قصير.

وقالت غادة إبراهيم في لقاء تلفزيوني: أنا لسه راجعة من العمرة من شهر ومن العمرة للعمرة يمحو الله ما بينها من ذنوب، وفي فرق بين الموبقات والكبائر وأنا لا أقرب الكبائر، وبحب ألبس لبس فاشون وبعمل خير كتير يمحي لي السيئات وبقرأ كتير في الدين وبصلي متواصل ومش بسيب فرض بقى لي أكتر من عشرين سنة، وفي الآخر الحاجات دي تعتبر من الموبقات مش الكبائر لأني مش بعمل سحر ولا قذف المحصنات ولا أكل مال اليتيم والربا وربنا يسامحني.

وأضافت غادة إبراهيم متحدثة عن ملابسها: لكل مقام مقال ولما أدخل مكان مجمع بلبس محتشم، ومقدرش أقول الحجاب مش فرض، وربنا يهديني ويسامحني وممكن الفترة الجاية أقرب أكتر من ربنا.

تصريحات غادة إبراهيم

واستكملت: لما جوزي اتجوزني قال لي حبيبتي أنا وضعي حساس مفيش بوس لزمايلك ولا لبس أوفر، قلت له طبعًا يا حبيبي أنا يهمني أرضيك لأن رضا الزوج من رضا الرب، وجم زمايلي يسلموا عليا قلت لهم عندي برد وواحد تنمر عليا وقال لي يعني أنت دلوقتي مش بتبوسي، وبعد ما انفصلنا رجعت تاني، لأن أنا يهمني رضا رجلي.

من ناحية أخرى، تحدثت غادة إبراهيم عن سبب إثارتها للجدل قائلة: الكايرزما من عند ربنا، وأنا مثيرة للجدل من عند ربنا، لأن في ناس حطاني في دماغها وناس حباني والناس عاوزة تعرف غادة فين وبتعمل إيه لأني عندي مصداقية وصراحة مش فايك واللي في قلبي بقوله.

وأضافت غادة إبراهيم: بقى لي 20 سنة في الوسط محدش سمع عني والتنمر حصل في السنوات الأخيرة لأن نجمي طلع وبقيت لذيذة وبطلع في المهرجانات وبعمل أعمال عربية داخل وخارج مصر وفي نفسنة، وفي حيزبونات ومنفسنين، وعندي أعداء من الوسط الفني والإعلامي ومن كل حتة.