عمرو أديب: مفيش حد أعز على الرئيس من دم البلد واللي غلطان هيتحاسب

قال الإعلامى عمرو أديب، تعليقا على حادث قطارى سوهاج: "البلد دى فى أول لحظة اتحركت وقالت مهما كان هيتحاسب، والبلد دى مفيش حد عزيز عليها أكتر من دم البلد، حقق واعرف واضرب بقوة يا ريس، مهما كان، مفيش حد أعز على عبد الفتاح السيسى من دم البلد، ومن اللحظة الأولى البلد دى وقفت على رجليها، بخلاف موضوع مركب قناة السويس، والأداء النهارده من اللحظة الأولى".

وأضاف أديب خلال تقديمه برنامج "الحكاية": "اللى غلطان مهما كان، إهمال أو عدم إهمال هيتحاسب حساب عسير، ويجب أن يكون القضاء سريعا ويجب أن يكون الحساب مريرا، واللى غلط يتحاسب أيا كان هو مين، فى أى مكان وأى منصب".

وأردف: "يا جماعة متضايقوش نفسكم خالص، البلد بتعمل كذا، هذه الحوادث واردة الحدوث وبنحاول نقللها، ولغاية دلوقت معندناش المزلقان والجهاز اللى بيشوف القطر دا، عاوز عاوز، مش عاوز خلاص، لكن افهم الحقيقة"، مستطردا: "هذا المرفق لسه مشاكله كتير ومحتاج فلوس كتير، ولسه محتاج وجهود كتير ولسه محتاج وزراء يخشوا ويمشوا كتير لغاية ما توصل لموقف طبيعى القطار اللى موجود فى أى بلد".

وذكر الإعلامى عمرو أديب، أن هناك تساؤلا نقف أمامه: "ليه المرفق ده بالتحديد لعنة كده وبيموّت المصريين؟ اشمعنى ده مقبرة المصريين؟ مفيش وزير جه غير ومعاه قطر راح، ولماذا كل حوادثه مؤلمة وقاتلة؟".

وأضاف أديب،:"قدامنا حل من الاثنين، يا نقفل القطارات وميبقاش فيه قطر فى مصر، واحنا قعدنا سنين من غير قطارات، ومحصلش حاجة يعنى، احنا يا عم بلد مينفعش نركب قطار، نوقف شوية لغاية ما القطارات تتحسن، ودا حل، أما الحل التانى، احنا بنطور القطارات، وقدامنا مئات السيارات من القطارات القديم متهالك وبيتصلح، نستحمل بقى المصايب لغاية الدنيا تتحسن، انتو عاوزين ايه؟".

وتابع أديب: "النهاردة كل واحد يغنى على ليلاه، محدش مهتم بالحقيقة والناس، وحق ربنا فى الحكاية، وكل واحد عنده غرضه، حد عنده حاجة عاوز يخلصها مع وزير أو دولة أو مع نفسه، بس محدش بص للناس والغلابة"، مردفا: "البلد دى خدت على عاتقها أنها هتصلح كل حاجة وهى ماشية، لو جبت سيمنز نفسه هتلاقى الحوادث بتحصل".

وأردف أديب: "عندما يتوقف قطار الناس يبقى عندها حاجة فى المنظومة شايفين قطار ويقولوا فى قطار واقف، ودا معندناش، جددنا مزلقانات ولسه فيه مئات المزلقانات عاوزة تتجدد، بلاها قطار"، متسائلا: "لو فى مصر المواطن عشان عاوز ينزل فى مكان ويدوس على فرملة الطوارئ، هو قبل ما يوصل للمحطة عاوز ينزل فى حتة بدل ما يمشى، لو دى حقيقية دا كفر، مش إهمال".

واستكمل: "احنا شعب مينفعش يركب قطار، احنا بلد متعرفش تدير قطار، بكلمك عن الحكومة، هذا البلد لا يستطيع إدارة قطار الآن".

وقال الإعلامى عمرو أديب، أن النائب العام يحقق فى حادث قطارى سوهاج، معه جهات فنية على أعلى مستوى، مردفا:"محدش هيستأثر بالرأى فى القرار وهيقول لنا ايه اللى حصل، وهل مواطنين أو عندنا مشكلة فى المزلقانات، وعاوزين نعرف الحقيقة، واللى مات مات، منموتش الباقى بالحيا".

وأضاف: "المرفق ده عانينا منه معاناىة على مدى 30 سنة"، مردفا:"شوفوا البلد، عشان تتقدم احنا عاوزين الحقيقة حتى لو كانت مُرة، وعاوزين نحاسب حتى لو كان حد كبير اللى هيتحاسب، ومفيش حد كبير على مصر ومفيش مناصب عزيزة على البلد".