تامر حسني يكشف صلة قرابته بـ هالة عمرى بعد إحيائه حفل زفافها: كانت من الفانز بتاعي ودلوقتي أنا في مقام والدها

كشف الفنان تامر حسني علاقته بهالة الذي أحيا حفل زفافها أمس في الأهرامات، وحضر حفل زفافها العديد من نجوم الفن.

وكتب تامر حسني عبر حسابه الشخصي بموقع التواصل الاجتماعي “انستجرام”:لكل اللي بيسأل عن ايه وجه القرابه بيني وبين العروسه الجميله دي شايف اسأله كتير انا هحكيلكوا هي اسمها هاله عمر عرفتها كانت بنت من الفانز صغيره ومن المقاتلين والمدافعين عن تامر على الانترنت ومن كتر دفاعها عني لفتت نظري ومره رديت عليها شكرتها ولما سافرت اسكندريه في الوقت ده لقيت بنت صغيره اوي بتعيط وبتجري عليا فا وقفتلها وفكرتني بنفسها وفضلت تعيطو تقولي احنا معاك ولازم تكمل عشان كنت بتحارب جدًا في بداياتي.

وأضاف:فااتصدمت أن اللي بتقول كده بنت صغيره كده والمجهود ده كله اللي عاملاه بنت صغيره عندها ١٤ سنه وقتها كانت السوشيال ميديا لسه بتطلع وكنا في شركتنا بندور على شركه كبيره تمسكلي السوشيال ميديا لحد ما قولتلهم أنا مش عايز شركه كبيره انا عايز البنت الصغيرة دي هي اللي تمسكها فضلوا يقنعوني أن كده مش صح ولازم اكتر حد خبره يمسكها وانا قولت لا لازم اكتر حد بيحبني هو اللي يمسكها وانا واثق أن طاقة الحب مفعولها اقوى من طاقة المحترف بلا حب فعرضت عليها تشتغل معايا وهي في السن ده مصدقتش طبعاً.

وواصلت:من ساعتها وهي اللي ماسكه كل شغل الميديا الطفلة الشاطرة اللي كبرت دلوقتي قدامكم هاله عمر، أما بقى عريسها العسل ده اسمه عمرو طلب اديها مني انا عشان والدها ووالدتها توفاهم الله. في سنه واحده رحمهم الله ياريت نفتكرهم ونهديلهم ثواب الدعاء والفاتحه ومن اللحظه دي اتحولت هاله لبنتي الكبيره بجد اللي بتتجوز دلوقتي قدامي وبسلمها لعريسها بنفسي وبغني في فرحها، معرفتش ارد على كلامك عني في الفرح يا هاله رديت دلوقتي هنا ربنا يكرمك ويسعدك مع جوزك الجميل المحترم اللي هيكون ضهرك وسندك ويكمل معاكي مشوار حياتك مع اولادكم الجُمال بإذن الله.