لا تذبحوا الـ "شريف" بينكم.. أول تعليق من رئيس تحرير mbc على مداخلة عادل إمام مع شريف عامر

في أول تعليق للكاتب الصحفي طارق آمين رئيس تحرير محطة MBC مصر، ورئيس تحرير برنامج" يحدث في مصر" تقديم الإعلامي شريف عامر على شاشة mbc مصر.

كتب آمين عبر حسابه على فيسبوك: "لا تذبحوا الـ "شريف" بينكم!، تابعت زي ما كل الناس تابعت حالة الاحتفاء الشديدة بمداخلة الفنان الكبير عادل امام امبارح بالليل لبرنامج (يحدث في مصر) مع شريف عامر.. واللي خرجت في جزء منها من كونها خبر أو انفراد أو خبطة أو حتي جت بالصدفة إلي حالة من الجدل والصراخ والغضب ووصلت للإساءة كمان واللي طالت الأخ والصديق شريف عامر ومنها ما طال قناة (أم بي سي) اللي باتشرف أكون ضمن فريق العمل فيها.. وبعيدا عن المداخلة اللي البعض وصفها بالانفراد أو جات بالصدفة أو.. أو.. واعتبر البعض التعامل معاها وادارتها بشكل راقي ومحترم من شريف عامر أو غير موفقة منه برضو.

وأضاف أمين عبر حسابه على فيسبوك:" عندي بعض الملاحظات حابب أقولها.- اذا سمح وقتك بالقراءة طبعا- أولها أن دي اول مكالمة بحسب تقديري من كام سنة للأستاذ عادل امام، والأهم كونها جايه في توقيت ما تردد وما يزال يتردد عن الحالة والوضع الصحي للأستاذ عادل امام، وبالتالي فاهميتها بلغة وسلو الشغلانة دي أنها بتكشف وتوضح وضعه وحالته الصحية ولو حطناها مع الصور اللي ظهرت امبارح من داخل بيته عن طريق المقربين بمناسبة عيد ميلاده الـ 83.."فده يبقي ابلغ رد علي كل ما تردد عن الفنان الكبير.. "ربنا يديله الصحة ويمتعه بطول العمر".

وتابع قائلا:" الحاجة التانية: الأستاذ عادل امام فنان كبير تربع علي عرش السينما والتليفزيون والمسرح لاكتر من 60 سنة، وده إن دل فيدل علي موهبة فذة وذكاء شديد والتزام كبير "وقول زي ما تقول" والاهم في السياق ده كمان أن الأستاذ عادل امام عارف امتي يتكلم وامتي يسكت.. امتي يظهر وامتي يختفي.. وبالتالي لما يوافق أو يحب - بشكل أدق - يطلع فيطلع من خلال المنصة دي / القناة دي / البرنامج ده.. فهو عارف بيعمل ايه.. وامتي وليه.. وده يخليك متأكد ان الأستاذ عادل امام.. عارف كويس هيطلع مع مين ويقول ايه.. واللي يعرفه كويس عارف أنه محدش يقدر يقوله اطلع ومتطلعش أو قول ايه ومتقولش ايه".

وأوضح" الحاجة التالتة.. التعامل مع المداخلة / بشكل خبري بحت سواء انفراد أو خبطة أو حتي مكالمة جت بالصدفة.... ده يخليك تشوف أن حالة الاحتفاء والجدل دي سببها اهتمام بقيمة وقامة الاستاذ عادل امام وبالتالي فمسألة هي خبطة ولا مش خبطة.. ده الرد عليه بس - وبدون رغي أو هري كتير- الحالة والاهتمام والانتشار للمداخلة دي اللي تحولت لأخبار وعناوين علي نطاق واسع اضافة بقي لحالة الجدل والصخب اللي دايرة خاصة وأن حضوره خلال المكالمة كان طاغي وكل كلمة ايفيه كالمعتاد.. والمؤكد أن المداخلة دي بتهد أي كلام عن حالته وصحته وخلافه، واللي تاكل عليها عيش شهور طويلة".

واستطرد قائلا:" الحاجة الرابعة: ولو كنت وصلت لهنا فانا باشكرك واعتذر عن الاطالة، فهي تتعلق بشريف عامر نفسه، اللي يقدر يدافع عن نفسه، في ادارته للحوار جوه الاستديو أو علي الهواء " لانه هو السفرجي، واللي ورا الكاميرا الطباخين" ومعروف بقي مين اللي بيتعرض للكلام من الزباين / المشاهدين سواء كلام حلو أو كلام في جنابه زي ما بيقولو" .. لكن حبيت أقول كلمتين عن الشخص ده واللي بتربطني بيه علاقة شخصية قبل المهنية، وباعتبره من انضف الناس اللي مروا علي الواحد في حياته.. واللي بيتعرض لحملة شديدة هو اللي دفعني للكلام هنا - وأنا مش من اللي بيكتبو أو بيتكلمو علي السوشيال ميديا الا فيما ندر- فأنا شايف أن الحملة الشديدة دي تبريرها في رأيي أو باشوفها في معظمها بسبب قيمة وقامة الضيف هنا اللي هو الأستاذ عادل امام واللي محبينه بالملايين في ارجاء الوطن العربي وكانو في أشد الحاجة للاطمئنان علي حالته وصحته، وكانو عايزين اطول وقت يسمعوه فيه ويطمنو عليه".

وأكد قائلا:" كمان الحملة دي واللي زيها توضح مرة بعد مرة ما يتوقعه وينتظره المشاهدين والمتابعين من مذيع بقيمة وأهمية شريف عامر كأحد اللاعبين الرئيسيين علي طاولة البرامج المسائية، ونجم من نجوم ما يسمي ببرامج الـ "توك شو" خلال سنوات عديدة ماضية بدأها في قنوات وقنوات أخري بدأت به، مقدما وما يزال يقدم وجبة متنوعة في المساء والسهرة تحترم عقلية مشاهدينه.. ويبقي ادراته للحوار زي الاعب اللي بيحط الكورة بالطريقة المناسبة للتوقيت والظروف.. لكن يبقي شريف عامر هو اللي الاستاذ عادل امام قرر يتكلم عبر منصته، والملايين اطمنت علي صحته عبر تلك المنصة وده المهم .. لكن يبقي شريف عامر كمذيع لسنوات طويلة لم يتلون ولا بيسعي لإثارة دهشة حد ولا اعجابه أو تعاطفه، هو باختصار "بيعمل الشغلانة ويروح".. لا هتلاقيه ضحك عليك.. ولا ضحك عليك حد - واقصد أي ضيف ظهر معاه أو بيظهر أو هيظهر"".

وأوضح أمين: "ميزة شريف بحسب الناس العادية اللي في الشارع انه مش محسوب علي حد، وطبعا في البعض مش بيحبوه أو دمه تقيل عليهم أو بيستغلسوه أو معترضين علي طريقته أو شايفين انه معندوش كاريزما، أو بتاع كلام مثقفين و.. و..و .. قول زي ما تقول.. فده برضو طبيعي وحق أي حد، بس في النهاية أنت صاحب القرار و"في ايدك ريموت التليفزيون علي طول.. تتابع مين ومتابعش مين".. أما القلة اللي مش بتطيقه، وبيستهدفوه شخصيا وانسانيا فمعنديش تعليق غير كلام شريف نفسه: "يا عم كبر دماغك في حاجات أهم من الكلام عني".