أحمد داود: أول أجر أخدته 150 جنيها وكان في مسلسل تاريخي

أكد النجمأحمد داودأن هناك مسلسلات لها معزة خاصة لدية ويحبها منها "سجن النسا، جراند أوتيل، هذا المساء، أهو ده اللى صار، سوتس بالعربى"، مضيفاً أنه يحب السينما أكثر من التليفزيون، واذا كان عليه الاختيار بين فيلم أو مسلسل سيختار الفيلم مباشرة، مضيفا: "أنا الآن وصلت إلى 13 سنة شغل وبعتبر بدايتى من فيلم ولد وبنت عام 2010".

وعاد داود للحديث عن فيلم يوم 13 خلال لقائه مع الإعلامية منى الشاذلى في برنامج معكم على قناةcbcوقال إنه قبل طرح الفيلم كان يجد كلاما مع الناس بأن عيد الفطر غير مناسب لعرضه، مضيفا: "الناس بقت تقول إزاى والعيد الناس بتروح للكوميدى والأكشن وكدة، ولكن ما حدث غير كدة والفيلم عمل شغل حلو أوى من اليوم السادس لحد دلوقتى أعلى فيلم بيحقق إيرادات والحقيقة كان يستحق نستنى عليه 3 سنين".

وكشف أحمد داود عن أول أجر حصل عليه كان 150 جنيها خلال مسلسل تاريخى في بداياته وقال: "المنتج وهو بيعرض عليا قالى هتظهر 8 حلقات والتصوير في 5 أيام وممكن أسبوع أو أسبوعين بس، في كل الأحوال الأجر 150 جنيه، وأنا وافقت على طول، وجابلى عقد 9 ورقات ومضيته، ووقتها رحت أجرت واشتريت هدوم وحاجات 450 جنيها لأن المسلسل كان تاريخى واتفاجئت إنهم جايبنلى كل اللبس".

وأكد أحمد داود أن أول أصدقائه في الوسط كانوا من مركز الإبداع وهم محمد ممدوح تايسون وأمير صلاح الدين ومحمد فراج ومحمد سلام، وكشف أن أول مرة قال لزوجته علا رشدى بحبك كان في مركز الإبداع أيضاً عام 2007، مضيفا: "وقت ما عرفت علا كانت هيا معروفة ومشهورة عنى، وكان اللى حواليها تقولها مين ده اللى هتتجوزيه ده واللى ماشية معاه وده بقى يحصل معايا أنا دلوقتى".