أيمن بهجت قمر عن أغنية شيرين بمناسبة عيد الأم: كتبتها وأنا بتخانق مع أمي

كشف الشاعر الغنائي أيمن بهجت قمر، موقف طريفه مع والدته أثناء كتابة أغنية "هي الدنيا"، التي قدمتها النجمة شيرين عبد الوهاب، بمناسبة عيد الأم.

وقال أيمن بهجت عبر صفحته الشخصية بموقع التواصل الاجتماعي "فيسبوك": "المشهد ده وإحنا قاعدين في الأستوديو بنعمل أغنية هي الدنيا لشيرين عبد الوهاب بمناسبة عيد الأم، قاعد أنا وشيرين وحسام حبيب وعمرو مصطفى وشيرين عايزاني أغير كلام الكوبليه وبتقوللي أقعد خلصه هنا دلوقتي عشان ننجز بابص في الموبايل لقيت رسالة من هشام أخويا أمك زعلانة منك كلمها قلت له حاضر بس أنا في الأستوديو هخلص واكلمها قفلت معاه بس ابتديت اتوتر".

اقرأ أيضا:بحبك يا أمى.. أغنية جديدة لمحمد نور بمناسبة عيد الأم (فيديو)

وأضاف: "لسه هبدأ في الكتابة لقيت رسالة من صادق أخويا الصغير كلم ماما عمالة تعيط اتوترت جدا وطلعت برة الأستوديو في عز التلج وموطي صوتي هقول للناس اللي جوه أيه بكتب أغنية للأم وأمي بتتخانق معايا إزاي؟ يا ماما معلش ماقصدش.. يا ماما أنا في الأستوديو وسط ناس ! وهي مافيش سخنانة جدا.. ابتديت أنا اتحرج طيب يا ماما أنا وحش يا ماما أنا عاق يا ماما، معرفتش أصالحها وقفلنا المكالمة على كده".

وتابع أيمن بهجت قمر: "طبعا ماجاليش نفس أكتب الكوبليه يومها لأني فعلا ماعملتلهاش حاجة، بعدها أمي ربنا يخليهالي حست أنها زعلتني (الفرق بينا 18 سنه قشطة يعني) بعتت صالحتني بس كنت كتبت الكوبليه بقى، ونزلت أهي الأغنية.. كل سنة وأمي طيبة وتفضل تناكف فيا بس بلاش وأنا في الاستوديو وبكتب أغنية للأم مش ناقصين عطلة يا ماما".

"أغنية هي الدنيا" من كلمات أيمن بهجت قمر، وألحان عمرو مصطفى.