نضال الشافعي يهاجم جوائز النقاد للدراما العربية: هم مين النقاد العرب دول وكمان هما أتفرجوا على 3 مسلسلات بس

أعرب الفنان نضال الشافعي استيائه من استفتاء جوائز النقاد للدراما العربية بعض أختيار فقط 3 مسلسلات ولم يتم تصويت على أي مسلسل أخر.

كتب الفنان نضال الشافعي في تعليق له عبر حسابه الرسمي بموقع فيس بوك: « مع احترامي الكامل مين النقاد العرب أسمائهم إيه.. هيئه تبع إيه.. وكل الناس اللي فازوا واللي ما فازوش.. هما اتفرجو على 3 مسلسلات دول مقدروش يكملو عشان صلاة التراويح.. رسالة الإمام ولا العربي بعافية.. والكتيبة.. وجعفر العمدة.. أنا أتمنى من أي وزارة أو الدولة أو حتى هيئة الإعلام.. ما فيش مهرجان أو جوائز أو لابد من موافقات ومتابعة وشفافيه».

واستكمل: «مش كل من هب ودب مبروك يا نجم أحسن ممثل في الكون.. إذا كان زمان جوائز لبان بم بم تحت إشراف وزارة الشئون الاجتماعيه وغطا إزازة البببيسي.. لكن الفن المصري.. كده أي حد عايز يجيب نجم يشهر جمعيته على قفاه أو نجم يدفع ودول قله».

نضال الشافعي عن جوائز النقاد للدراما العربية

وتابع الفنان نضال الشافعي تعليقه: «ياجماعة ده بيقلل قيمة التقدير واحترام باقي الفنانين وتعبهم.. مافيش حد في مارثون رمضان اللي بيسف التراب من أكبر نجم لأقل عامل وناس بتموت.. ويجي واحد معاه 4 جنيه يقولك ده حلو ده وحش وعداد مضروب تصويت الجمهور وبيتغير في لحظة».

وقال أيضًا: «حاجه تضايق.. وتقلل القيمة.. وتقلل فكرة الفن والإبداع.. يعني تخيلو الأوسكار.. دينزل واشنطن مكلف لجان تشتم في جاك نيكلسون.. عشان ياخدها منه.. لا أقصد الإهانه لأحد وأكن الاحترام لكل الناس.. بس دبلوماسيتي طرشأت».

واختتم نضال الشافعي تعليقه: «ما نعمل كراتين جوايز زي كراتين رمضان ونوزعها على نجوم رمضان إنهم الأفضل والأحسن بين خلق الله كلهم.. والمكان معروف في العتبه والاستنبات موجوده.. في الزجاج بـ 25 جنيه.. والدرع بمية الدهب 35 جنيه.. الصفيحة النحاس بالعلبه القطيفه بـ 55 .. بفكر اشتغل فيهم مشروع حلو».