المطرب عنبة: كان نفسي أمثل من زمان ودعاء أمي خلى بداية أعمالي مع يسرا في مسلسل «ألف حمدلله ع السلامة».. وبختم القرآن في رمضان لأنه شهر الخير |حوار

كان نفسي أمثل من زمان ودعاء أمي خلى بداية أعمالي مع يسرا

أنا نرجسي أوي ومش بتابع غير شخصيتي علي بويكا في رمضان

خدت تصريح من النقابة الأول قبل ما أمثل ومش ممكن اسيب الغناء لما ابقى ممثل كبير

بختم القرآن في رمضان لأنه شهر الخير ومسلسلي بيتعرض بعد الفطار الحمد لله

قولت ليسرا أنها هتبقى وش الخير عليا في التمثيل وهاجي يوم واقولها زي أحمد عز ما قالها أنتِ وش الخير عليا

بعد كده مش هوافق غير على الأعمال اللي تعليني وده مش غرور ده ثقة

لم يكتفي بنجاحه في الغناء فاتجه لتحقيق نجاح أكبر في التمثيل، وشارك مع نجمة مصر الأولى يسرا في دراما رمضان 2023، بمسلسل “ألف حمد لله ع السلامة”.

مطرب المهرجانات عنبة المعروف عنه أنه يحقق نجاحًا كبيرًا في أي مجال يتجه إليه بذكائه وأداؤه الأكثر من رائع، بعد عرض مسلسله المعروض في رمضان.

حاور موقع “بصراحة”، عنبة ليكشف كواليس مشاركته في مسلسل “ألف حمدلله ع السلامة”، وتعاونه مع يسرا والعديد من صُناع الكوميديا.

وإلى نص الحوار:-

-كيف تم ترشيحك لمسلسل “ألف حمدلله ع السلامة”؟

كنت روحت مسرحية مع شيماء سيف وبيومي فؤاد في السعودية كانت أول مره ليا أمثل فكلهم اتصدموا بيا عشان هما يعرفوا إن بغني مش بمثل كانت اسم المسرحية جامعة المشاغبين، فعرفت بعدين من شيماء أن شركة العدل هتكلمني عشان ان شاء الله هتكون في مسلسل مع يسرا في رمضان، طبعا أنا سمعت الخبر من هنا وفرحت يسرا بقى، وطبعا مع شيماء وثروت ومايان وآدم، فشيماء هي اللي رشحتني، بس بعد كده عرفت أن هما كانوا بيدوروا على حد يكون كوميدي وجديد في الدور ده، فروحت وقعدت مع عمرو صلاح ويسرا، وكلنا قاعدين وبنقرأ السيناريو فأول ما شوفت أول حلقة ضحكت جدا وانبسطت أن هما مديني حاجة هقدر امثلها بحقيقة أكتر لأنه دور ابن البلد، وكلهم ساعدوني، وكلهم كانوا بيقولوا ليا عندك كويس ويوجهوني صح.

-حدثنا عن شخصيتك في العمل؟

علي بويكا جدع وابن بلد، موقفه زي ناس كتيرة موجودة في مصر وبيعمل مواقف كتير ومش بيقول فهو بيلاقي سماح اللي هي مايان معاها شنط كتير أوي على الكورنيش وأنا شغال هناك، فجأة في ناس بتعاكسها فأنا بروح أدافع عنها ومش عايز منها اي حاجة، وبفهم بعدين أنها متسوحة ومامتها قالتلها انزلي دوري على فندق فأنا بعرض عليها بجدعنه بقولها بدل ما تباتي في الشارع تعالي عندنا احنا ناس طيبين في منطقة الجمالية ناس ولاد بلد وأمي وأبويا ناس كويسه، وشخصيتي هي أنا في الحقيقة.

-هل موهبة التمثيل وليدة اللحظة؟

أنا حسيت إن أنا عندي موهبة التمثيل لأن أنا كان نفسي أمثل من زمان طبعا لما أمثل لازم ابتدي صح، ومفيش أحسن من يسرا ابدأ معاها انسانه جدعة وطيبة حتة سكرة ومش بتعتبرنا ولادها هي فعلا صاحبتنا، وبالنسبالي مش شايفها كبيرة خالص دي واحدة بتحب شغلها، وبتعمل اللي مفيش شباب دلوقتي بتقدر تعمله وبتسهل الدنيا ودعوة أمي ليا أن أول نجومية ليا تكون مع يسرا.

ماذا عن تعاونك مع الفنان محمد ثروت وشيماء سيف ومايان السيد؟

محمد ثروت وشيماء سيف أحسن ناس بتعمل كوميدي في مصر حاليا فده حظي التاني ودعوة أمي ليا أن أمثل معاهم، ومايان وآدم عسل وعاملين الدور صح، هما المفروض أجانب، كل واحد في المسلسل عامل دوره في الحقيقة واخد حاجة مقبولة منه ومش مصطنعة.

ماذا عن تعاونك مع المخرج عمرو صلاح والعدل جروب؟

مش كل المخرجين كويسين في الكواليس، أما عمرو صلاح كان بيتعامل معانا أخ ويقولي طب ما تيجي تقول كده يا عنبة قولها بالطريقة دي طب قول الافيه ده ودي دعوة أمي ليا بردوا، والعدل جروب التعامل معاهم محترم جدا وناس عارفه هي بتعمل ايه وجمال العدل قعدت معاه واتكلمت وهو راجل مثقف جدا ومتفهم اللي بيحصل مع الشباب.

حدثنا عن تعاونك مع الفنانة يسرا؟

يسرا من الناس اللي حببتني في التمثيل هي بتخلينا نقول مفيش غيره وحقد وعايزانا كلنا نبان وبتقولنا دايما نجاحكم من نجاحي.

-كيف ترى المنافسة في رمضان 2023؟

أعمال رمضان فيها منافسة بس بقول بمنتهى الصراحة شايف ناس بتكرر نفسها كتير في رمضان ومسلسل ألف حمد لله على السلامه هيكون أكتر عمل مختلف في رمضان وكل مسلسلنا خارجي وكوميديا مش رخيصة، وأنا نرجسي أوي ومش بتابع غير شخصيتي علي بويكا في رمضان.

بتاخد رأي مين عند أختيارك للأدوار التي تقدمها؟

باخد رأي عقلي لما باجي أكرر حاجة، فيسرا اسمها كبير ولما تيجي تعمل حاجة مش هتعمل اي كلام فمش محتاج أفكر كتير ولما قالولي موافقتي كانت سريعة.

-ما رأيك في أعمال المنصات؟

المنصات حاجة كويسة بسبب أن الناس بتكره الاعلانات اللي بتيجي والمسلسل شغال فده أحسن حاجة فيها وأنا من الناس اللي بتتفرج لأن أنا بحب اتفرج على الحاجة مره واحدة من غير اعلان، والأعمال اللي بتبقى 15 حلقة حلوة بس على حسب السيناريو.

ما هي طقوسك في شهر رمضان؟

بختم القرآن في رمضان لأن شهر الخير ومسلسلي بيتعرض بعد الفطار الحمد لله.

هل تمارس شئ آخر غير التمثيل والغناء؟

بلعب كورة وأي حاجة فيها هدف بقدر اعملها الحمد لله لأن أنا جايبها من الصفر أوي فبحب التحديات بحب اتحدى نفسي، ومش ممكن اسيب الغناء لما ابقى ممثل، وخدت تصريح من النقابة الأول، وأمي دايما بتدعيلي وتقولي ربنا يحبب فيك خلقه فدي سبب كل حاجة بتحصلي حلوة في حياتي، ومش بخاف من اي حاجة بعملها.

بتقول ايه لـ يسرا بعد نجاحك في “ألف حمدلله ع السلامة”.. وهتختار أدوارك ازاي في الفترة المقبلة؟

أنا قولت ليسرا أنها هتبقى وش الخير عليا في التمثيل وهاجي يوم واقولها زي أحمد عز ما قالها أنت وش الخير عليا، أنا مش ببص تحت رجلي خالص ومش هختار اي أعمال بعد كده أنا هختار اللي يعليني بس وده مش غرور ده ثقة.