مايان السيد: اتعلمت من يسرا كتير في مسلسل «ألف حمدلله ع السلامة».. وبحب الرقص الشرقي والهيب هوب وبحاول أختم القرآن في شهر رمضان |حوار

بحاول اتعلم من يسرا كل حاجة لأنها من الملتزمين في شغلها وساعدتني في مسلسل «ألف حمدلله ع السلامة»

بسمع مهرجانات وغنيت أنا وعنبة في اللوكيشن وأقول حبيبي بابا ونفسي أعمل دويتو معاه

بحاول أختم القرآن في رمضان وبلتزم بالعادات الدينية كلها

نفسي أعمل السيرة الذاتية لسعاد حسني وفاتن حمامة ولو شخصية تاريخية تبقى كليوباترا أو نفرتيتي

بحب الرقص الشرقي والهيب هوب وبحب المزيكا جدا وبتعلم اشتغل على صوتي مش عشان أبقى مغنية

مش بيهمني حجم الدور لما باجي أشتغل بهتم بالكيفية مش الكم خالص

تتميز بأدوارها المشوقه، وتمتلك جماهيرية كبيرة، واستطاعت في الماراثون الرمضاني الحالي 2023، أن تحجز مكان ضمن الأفضل هذا العام رغم وجود العديد من الأعمال.

مايان السيد الفنانة الشابة التي حجزت مكانها ضمن نجمات الصف الأول منذ ظهورها على الساحة الفنية، حققت نجاح الكبير هذا العام بمسلسل “ألف حمدلله ع السلامة”، وحاور موقع “بصراحة”، الفنانة الشابة لتكشف تفاصيل تعاونها مع يسرا، وما هي طقوسها في شهر رمضان.

وإلى نص الحوار:-

كيف تم ترشيحك لمسلسل “ألف حمدلله ع السلامة”؟

كنت في الجامعة قبل ما اتخرج بفترة، فجالي مكالمة من إسراء العدل وعرضت عليا، فأنا بحب العدل جروب واشتغلت معاهم في حرب أهلية فبصراحة أنا اتحمست جدا لأن أنا بحب يسرا جدا وبعتبرها، حد من عيلتي وإن أنا بنتها وبرتاح معاها جدا، ففرحت إني هشتغل معاها فمقولتش ليها لا، هي لو في اي حاجه هتعملها واحتاجتني معاها هعملها، حتى لو شخصية مكررة أو مش متحمسة ليها، بس هوافق عشان يسرا موجودة في العمل ده، فقولتلهم أكيد وروحت مضيت في الشركة واتكملنا شوية عن المسلسل.

كيف استعديتي للشخصية؟

سماح ومامتها وأخوها راجعين من كندا، فطبعا أول حاجة جت في بالي هما بيتكملوا ازاي، هما مصريين 100% ولا عشان متربيين هناك طريقة الكلام هتبقى مختلفة، فقالولي اخوكي هيبقى أدهم الشرقاوي فقولت بس كده أنا لازم أشتغل على اللهجة، واكسر العربي بتاعي، لأن في الحقيقي أدهم راجع من أمريكا فـ مش بيتكلم مصري كويس فأول حاجة اشتغلت عليها هي اللغة لحد ما نيجي نصور.

حدثينا عن شخصيتك في العمل؟

سماح بنت عندها شغف للسينما وبتحب مصر جدا ونفسها تروح من زمان فلما بيجي فرصة أنها تروح مصر هي بتبقى الشخص المتحمس، فبتروح لأنها عايزة تشوف الثقافة اللي في مصر، وتشوف المجتمع في مصر عامل ازاي فعندها حلم أنها تشوف أفلام وتبقى زي يوسف شاهين وتروح مهرجان كان، وتبقى مخرجة كبيرة في بلدها فبحب الدور ده عشان مفيهوش شخصيات مركبة ويشوفوا الرحلة وأحنا بندور على شخص معين طول المسلسل.

ماذا عن تعاونك مع يسرا؟

كل مره بتفاجئ بيسرا وهي قد إيه بتحب شغلها وبيحب تيجي في ميعادها ومش بتتأخر دقيقة بجد عن التصوير وتلقائية جدا في الكوميديا فاتعملت منها ده، وهي بتحب تحكيلنا كتير عن يوسف شاهين هي بتحبه جدا، والتعامل مع عادل إمام بتحكيلنا عنه فبنتلم حواليها ونقعد نسمعها دايما حكاويها لأنها عندها تاريخ كبير جدا واحنا كشباب لازم نستفاد منها ونتعلم منها، وهي كانت في زمن فيه رموز فكون أقعد أسمع ده منها حاجة هتخليني أشطر وأحسن.

ويسرا في اللوكيشن بتقعد تجمعنا وتجيبلنا أكل ودايما تجيبلنا جبنة وعيش، فهي شخصية بنحبها أوي ولو تعبان تيجيبلوا علاج.

ماذا عن تعاونك مع محمد ثروت وشيماء سيف؟

محمد ثروت وشيماء سيف ده أول تعاون بينا، ولكن في الشغل مش بنقدر نمسك نفسنا من الضحك منهم، وهما في الحقيقة طيبين جدا وأنا شخصية بحب الناس اللي زي دي، ومش بحب الناس القاسية واللي مش بيحبوا غيرهم، فمسلسل ألف حمد لله على السلامة مفيهوش حد مش طيب ومش بيحب غيره كله بيحب اللي معاه، ومش بيبخلوا على حد بالافيه، وشيماء سيف كانت بتساعدني في الايفهات، فحبيت الكرو كله جدا وآخر يوم في التصوير أكيد هعيط.

حدثينا عن تعاونك مع عنبة في أول عمل درامي له؟

مكنتش متوقعة قد أي عنبة تلقائي في أول عمل ليه، وقد اي هو طبيعي ومش بيفكر قبل ما يتكلم، هو بيضحك جدا على الحقيقة ودمه خفيف، ومتأكده إن الناس حبته بسبب شخصيته الجدعة، الولد المصري الجدع وأعرف حد في حياتي زيه وبعتبره خلاص صديقي،بسمع مهرجانات وأنا بغني اللي عنبه بيغنيه في اللوكيشن وكنت كل شوية أقول حبيبي بابا واغني أغانيه، ونفسي أعمل دويتو معاه.

مين في حياتك يشبه شخصية سماح؟

ناس كتير في الجامعة شبه شخصية سماح، لأن أغلبهم كانوا عايشين برا مصر، فشخصة سماح كانت مامتها مربياها على الثقافة المصرية فهي عارفة الصح من الغلط، وعارفه دينها ومش هي أجنبية 100%، ومتمسكة بعادات وتقاليد.

ماذا عن المخرج عمرو صلاح؟

أنا برتاح مع المخرج الهادي ومش بتوتر، أستاذ عمرو مش بيزعق في اللوكيشن وبحسه حد من الكاست ومش فوقي فعاجبني الهدوء ده جدا، وبيقول على حاجات ممكن اعملها بجسمي فعلا تموت من الضحك، أنا مبسوطة إن هو معايا في كل حاجة بتعملم منه جدا لأنه حنين وطيب وهو من المخرجين اللي انبسطت معاهم جدًا.

لكل عمل صعوبات.. ما هي صعوبات«ألف حمدلله ع السلامة»؟

البرد أكبر صعوبة واجهتني في المسلسل صورنا في الشارع كتير جنب النيل وعلى الكورنيش وسافرنا دمياط فالجو برد جدا والشتا ده أصعب شتا عدى عليا جالي برد يجي 5 مرات البرد كان صعب جدا جدا، وشعري كان من ضمن الصعوبات اللي واجهتني بردوا كنت سايباه كيرلي طول الوقت ودايما كنت بحاول أحافظ على اللوك ده.

-ما رأيك في دراما رمضان هذا العام؟

السنادي شايفة مسلسلات كتيرة والمسلسلات بدل ما كانت 30 حلقة بقت 15، وشايفة إن المفروض كله يقلب 15 لأن الكل بقى بيحب السرعة، المنافسة يسرا بقى ليها مكانة في رمضان وكده كده هتنجح بتمنى كل الناس تنجح واحنا يكون لينا مشاهدة.

طقوسك في شهر رمضان؟

بحب اصحى بدري عشان أصلي كل الفروض في رمضان ولو مصحتش بدري هكسل، وبلتزم بالعادات الدينية ومش بحب أخرج بحب اساعد مامتي في البيت، عندي أخوات كتير في البيت وهختم القرآن السنادي كله بإذن الله وبخرج مع أصحابي بالليل.

هل تشاهدي أعمالك بعد عرضها؟

أنا أكبر ناقدة لنفسي وبقعد أركز في كل تفصيله وأنا بسمع أعمالي، فبحاول السنادي معملش كده، المكياج بحاول اتعلم الحاجات دي بنفسي، ونفسي أعمل شخصية مدمنة بالمكياج وأحب أعمل بوكس في وشي

من هو المخرج التي تتمنى مايان السيد العمل معه؟

نفسي أشتغل مع مروان حامد أوي ودي أمنيتي وعمرو صلاح اشتغل معاه تاني.

-ما هي هوايتك المفضلة خارج التمثيل؟

بحب الرقص الشرقي جدا جدا وبحب الكنتمبري والافرو والهيب هوب وبحب المزيكا جدا وبتعلم اشتغل على صوتي مش عشان ابقى مغنية بس عشان لو جالي مسلسل غنائي ابقى قد المسؤولية وبحب القراءة السير الذاتية

ما هي السيرة الذاتية التي تتمني تقديمها؟

نفسي أعمل السيرة الذاتية لسعاد حسني لأني بحبها أوي وفاتن حمامة، ولو شخصية تاريخية أحب اعمل حاجة تخص بلدي زي مثلا كليوباترا ونفرتيتي لأنهم كانوا ستات قوية وملكات مصر

معايير اختيارك للأدوار التي تقدميها؟

لما بجي أعمل عمل لازم أعرف مين المخرج بكون مطمنه لما أعرف أن فيه حد بيطمن عن العمل وبيحب الكرو كله، ولازم اقرأ العمل كله مش دوري بس، وبشوف الدور ومش شرط حجمه لازم أشوف هيطلع مني طاقة تمثيلية عامله ازاي وبحب الأدوار الصعبة بحب الكيفية مش الكم خالص