تامر حسني: لو غلطت في حاجة زمان ده مش معناه انك مينفعش تبقى ضد التصرف ده دلوقتي

وجه الفنان تامر حسني نصيحة لجمهوره عبر حسابه الشخصي بموقع التواصل الاجتماعي “ فيسبوك”، وكتب :من خلال قرائتي و دراستي الفتره الاخيره لبعض العلوم و اهمها علم الدنيا اللي احنا فيها دي و من خلال تجربتي الشخصيه حابب اتكلم عن حاجه مهمه اوي و تخص كل واحد فيكم نفسه يتقدم”.

وتابع :” يتقدم في عصر الاحباط اللي احنا عايشين فيه ده..لو انت غلطت في حاجه زمان ،، ده مش معناه انك مينفعش تبقى ضد التصرف ده دلوقتي دا مش نفاق انت بس كبرت و عقلت و فهمت و بقيت افضل زي ما ربنا عايزنا نتطور للافضل”.

وأضاف :” فمتسمحش للناس انهم يستخدموا ماضيك عشان يهدوا فكرك الحالي دلوقتي .. ده تطور طبيعي للّي عايز يبقى انسان كويس و قلبه سليم”.

وتابع :” بالعكس بقى لازم لما حد يفكر يضايقك بطاقه محبطه .. انا عايزك تاخد الطاقه دي تشتغل بيها و تحولها لوقود حرق يخليك تنجح و تعلى اكتر عنداً في اللي عايزين يشوفوك فاشل و تبقى عاده عندك كل ما حد يحبطك تنجح و تطور نفسك زياده لحد ما اللي بيحبطك يشوفك فوق جداً و فارق عنه ،،، ساعتها هيضرب نفسه بالجزمه انه كان بيحاربك عشان هو هتبقى طاقته فضيت و فشل عشان وظف طاقته ليك وانت وظفت طاقتك و طاقته لخدمتك”.

وأشار :”فبقى عندك كذا دافع للنجاح يسخنك و يحفزك … هيجيلك هو بقى ساعتها ضعيف و ندمان .. اوعى تنتقم منه و افتكر ان العفو عند المقدره ثوابه كبير اوي عند ربنا فبرضو هتاخد اكبر ثوابه و برضو بسببه و هتعلى تالت ،،، و بكده انت بذكائك و ايمانك بنفسك و تقديسك لوقتك عرفت تخلي كل اللي جالك منه او من الناس اللي شبهه في مصلحتك انت عشان ركزت في نفسك و مشيت في حالك زي ما ربنا عايزك و حذفت الناس المحبطه من حياتك”.

واختتم حديثه موجها نصيحة لجمهوره :”ثق في نفسك ثق في تغييرك انت صح ..اوعى تشوف نفسك قليل كمل متشوفش نفسك غير ناجح و واصل لحلمك و يارب اشوفكم كلكم ناجحين و مش ملتفتين لأي مُحبِط و موظفين طاقتكم لخدمتكم عشان طاقتكم زي البطاريه لما يجيلها يوم و تخلص ،، تبقى خلصتها على نفسك و تطوير نفسك مع نفسك وعلاقتك مع ربنا قبل الكل”.