روجينا: براهن على مسلسل «ستهم» لأنه يمس كل امرأة صعيدية.. وجاتلي حالة نفسية صعبة بسبب ارتدائي ثوب الرجال |حوار

مسلسل ستهم تحول فني في حياتي وبراهن عليه لأنه يمس كل امرأة صعيدية

مبنعملش قصة حياة حد ولا سيرة ذاتية دي قصص حقيقية وبنمثلها

جاتلي حالة نفسية صعبة بسبب تحولي لثوب الرجال في مسلسل ستهم

ياسين التهامي إضافة كبيرة للعمل وكل الناس بتحبه وأنا كنت بجري وراه في الموالد

ربنا حباني إني أعمل حاجات للمرأة وأدافع عنها في ستهم والعمل بمثابة تكريم ليها

اللهجة الصعيدية مفيهاش قواعد ثابتة لكن قدرت اتخطاها في ستهم بسبب خبرتي السابقة

أرتدت ثوب الرجال من أجل تحقيق النجاح والتقمص في الشخصية لـ اتقانها على أكمل وجه ممكن، روجينا “ستهم”، وهذا قد لا يحمل اسم المسلسل فقط بل يحمل أنها استطاعت أن تتمكن في أدائها الاحترافي لـ تصبح “ستهم” على الحقيقة في دراما رمضان 2023.

وكان لنا في موقع “بصراحة”، حوار خاص مع النجمة روجينا لتكشف كيف استطاعت أن تتقن شخصيتها في مسلسل “ستهم”، وما هي رسالتها التي كانت طوال العمل تسعى لتحقيقها.

وإلى نص الحوار:-

-في البداية.. من أين جاءت فكرة مسلسل “ستهم”؟

بدأت فكرة ستهم بحلم رؤوف عبد العزيز، كنا بنصور في مسلسل انحراف، وكلمني تاني يوم الصبح وكنا بنفكر ايه اللي هنعمله في 2023، قالي أنا حلمت بالمشروع اللي هنعمله قالي في ستات بيلبسوا ثوب الرجال، وأنا بفكر أن أنتي تعملي ده، قولتله يعني أنا هعمل راجل قالي اه، وقالي إن هو حلم باسم المسلسل، قولتله الاسم ايه قالي ستهم، فدي كانت أول فكرة لمسلسل ستهم هي فكرة استاذ رؤوف عبد العزيزوهو اللي اختار المسلسل.

تطورت الفكرة بعد كده، أنه فكر مين يكتبه، فملاقاش أهم من ناصر عبد الرحمن يكتبه، لأنه راجل صعيدي وإنه من أهم الحاجات اللي آثرت في المجتمع والصعيدي عند ناصر عبد الرحمن مختلف فدي كانت الفكرة.

-هل ذلك أول عمل صعيدي لـ روجينا؟

لا كان عندي “الفرار من الحب”كان صعيدي و عملت تجربة تانية مع الراحل هشام سليم، مسلسل اسمه درب الطيب اخراج نادر جلال وهو كان مسلسل صعيدي وبعدها آخر حاجة ستهم.

-كيف استطاعتي اتقان اللهجة الصعيدية في العمل؟

اللهجة الصعيدية الحمد لله عشان اشتغلت قبل كده صعيدي فعندي مبادئ ثم عم حسن قناوي وحسان قعدنا بروفات كتيرة أوي من غير ترابيزة وبروفات تكسير اللهجة وهما كمان كانوا مصعبينها علينا لانهم مش عايزني أقول الصعيدي صعيدي، هما عايزيني أجيب أتيتيود الصعيدي، لإن اللهجة دي مفيهاش قواعد يعني مفيش ضمة وفتحة وفيه كلام يتقال فهي كان موضوع صعب أوي أوي بس لإن أحنا قعدنا كتير نكسر في الموضوع ده، فالحمد لله لما بدأنا تصوير مكنش عندي مشكلة وكنت خلاص عرفت الكلام بتفخيم اللغة، وغير كده أنا عندي مشاهد صعبة في العمل فلازم تركيز يكون متوجه للأداء بس وميبقاش شاغلني اللهجة فالحمدلله عدينا المرحلة دي بجدارة.

-لكل عمل صعوبات.. ما هي صعوباتك في “ستهم”؟

العمل ده تحول فني في حياتي بشكل كبير أنا براهن على مسلسل ستهم لإنه مش مجرد عمل ممثلة بتراهن فيه على دور، أنا براهن على دور وعلى قضية وعلى مسلسل صعب جدًا جدًا، ولكن يمس كل مرأة في الوطن العربي، ستهم هتلاقيها في كل بيت بشكل مختلف ومغاير، أول مره قصة كفاح أمرأة صعيدية أو قصة صعود أمرأة، فهو على قد صعوبة المسلسل والمجهود اللي فيه هيكون تغير جزري في حياتي وفي مشواري وفيا أنا كممثلة.

-هل العمل يناقش سيرة ذاتية؟

المسلسل من قصص حقيقية في الحياة، أحنا مش بنعمل قصة حياة حد ولا سيرة ذاتية لحد.

-هل تخوفتي من تحولك لثوب الرجل؟

كنت خايفة من التحول ده، وفي البروفات وأنا لأول مره بعمل المكياج الرجالي وجاتلي حالة نفسية صعبة جدًا والكل لاحظة عليا، وكنت عندي حالة عصبية شديدة وقلق وتوتر، وأنا المسألة أصعب ما في الموضوع مش أني ألبس توب الرجال، الصعب إني أنت تصدقني وتصدق إن أنثي تشتغل مع رجالة ، فطبعًا كان في صعوبة جدًا، ولكن كان في متعة كبيرة جدًا، وكان جوايا روح ممثل، وبستمتع إن بكسر خوفي وأحس إني انتصرت، فالعمل ده كان بالنسبالي مختلف.

-هل كنتي منحازة للمرأة؟

لو مدافعتش عن المرأة تفتكروا هدافع عن مين غيرها، ولو مكنتش أبقى مهتمة وقلقني وشاغلني قضايا المرأة هيشغلني قضايا مين، ولو مكنتش حريصة في كل مسلسل أقول حاجة عن المرأة أقول لمين، يعني أنا بقول إن ربنا حباني إني أعمل بطولة أو قضية تمس بني جنسي وهي المرأة، وأنا بعتبر إن ستهم رسالة تكريم للمرأة بشكل عام، وبيشكر كل من يحترم المرأة.

-حدثينا عن تعاونك مع المخرج رؤوف عبد العزيز؟

التعاون مع رؤوف عبد العزيز سعيدة جدًا، وبتجربة انحراف، وستهم وأعتقد إن اختيارنا لبعض وشغلي مع رؤوف عبد العزيز هكون حريصة أنا وهو إنناى نعمل مواضيع مختلفة، وتمثيل مختلف، وهو مخرج فريد وحقيقي ورائع ومفرداته في الاخراج هايلة، فبشكره إنه اختارني في الدور ده.

ماذا عن تعاونك مع المؤلف ناصر عبد الرحمن؟

سعيدة إني بشتغل مع المبدع ناصر عبد الرحمن، اللي على إيده قضايا كتيرة للمجتمع وقضايا كان فيها تنوير وكان فيها تقشف، لحاجات كتير في مجتمعنا حصلت بعدها بـ 10 سنين، فسعيدة إن ناصر عبد الرحمن وثق فيا، وسعيدة إنه اختارني، فالحمد لله إن كان في طاقة إيجابية ليه تجاهي.

-الفنان إياد نصار كان له دور صغير في البداية لكن كان مؤثر.. ماذا عن تعاونكم؟

سعيدة بمشاركة إياد نصار في العمل، وبقول للكل إنكم لما تتفرجوا على العمل، هتكتشفوا إن البطل الحقيقي في ستهم هو إياد نصار.

-شيخ المنشدين ياسين التهامي كان له آثر كبير في العمل.. ماذا عن تعاونكم؟

مدد يارب عشان الشيخ ياسين التهامي، مكنش مجرد شيخ المداحين في العمل اللي كلنا بنحبه وأنا من ضمنهم بحبه، وكنت بلف وراه في الموائد، فلك أنت تتخيل أن الشيخ ياسين هو صوت مسلسل ستهم، وإن هو بيمثل في ستهم، والحقيقية حصل بيني وبينه في التصوير حاجات، كتيرة أوي وبعد اللي حصل ده كنت فخورة بنفسي إن هذا المدد حصل بيني وبينه، وحاجات مخليناني مبسوطة أوي باللي حصل خلال التصوير بالمدد والفضل اللي حصل