أحمد عيد: السيناريوهات والمواضيع اللي بتتناقش في الدراما بقت كلها شبه بعض مفيش تميز.. كنت خايف من رد فعل الناس على عودتي للتمثيل وإني أكون مش قد المسؤولية |حوار

كنت خايف من رد فعل الناس على عودتي للتمثيل وإني أكون مش قد المسؤولية

سبب غيابي إني مكنش فيه شغل مناسب وأعمال تقدمني بشكل كويس وترضي طموحاتي

السيناريوهات والمواضيع اللي بتتناقش في الدراما بقت كلها شبه بعض مفيش تميز

قبل ما أعمل الدور سألت في الأول عن اللغة الصعيدي واتعلمتها

كل شخصية مختلفة بتضيف ليا لإن بحب الشخصية المؤثرة واللي متتنسيش

أفتقده العديد من محبيه بعد غيابه الكبير عن الساحة بعد آخر أعماله “صاحب السعادة”، وبدأت التساؤلات عن سر اختفائه طوال تلك الفترة، إلا أن ظهر في مسلسل “عملة نادرة”، بدراما رمضان 2023، وخطف الأنظار في أولى حلقات العمل.

أحمد عيد أسطورة فنية صُدمت وأُخفيت عن الساحة بسبب الأدوار غير المناسبة، التي كانت تعرضت عليه، إلا أن لقى دور مختلف تمامًا في مسلسل “عملة نادرة”، وبدأ في تقديمه.

وكان لموقع “بصراحة”، حوار خاص مع النجم أحمد عيد، بعد نجاحه في أولى حلقات العمل، وإلى نص الحوار:-

-في البداية من الذي رشحك للمشاركة في “عملة نادرة”؟

كلمني أستاذ هاني عبدالله وقالي الدور، وخوفت في الأول لكن ماندوا العدل كلمني وأقتنعني بالحكاية، وشجعني إن أخوض التجربة، واكتشفت إن كنت هبقى غلطان لو معملتش الخطوة دي.

-أي هي العملة النادرة اللي في حياة أحمد عيد؟

العملة النادرة اللي في حياتي إن الاقي أعمال فنية على قد المستوى وأعمال فنية قيمة، وأعمال ذات قيمة عند الناس ومش ضروري تبقى فلسفية مقعرة بس تبقى حاجه نضيفة، ومتعوب عليها فالعملة النادرة دلوقتي إن الاقي عمل مكتوب كويس والاقي دور يشد، وأقدر اعمل حاجه جديدة، ويبقى معانا فريق يقعد معانا ويفهمنا مش تبقى كل حاجة جري في جري، عشان نعرف نعمل اتقان.

ما هي مشكلة الأعمال الفنية الحالية من وجهة نظرك؟

عندنا مشكلة في السيناريوهات، والمواضيع اللي بتتناقش كلها شبه بعض، الأعمال بقت بتتاخد من على الوش، مفيش عمل فيه عمق ولا في تجديد، لازم نجدد مش كل حاجه تبقى استنباط ونفس الشخصيات ده حتى الممثلين بقينا بنحسهم نفس الناس، لا لازم يبقى فيه فرص وموضعات جديدة.

حدثنا عن تعاونك مع الفنانة نيللي كريم والمخرج ماندوالعدل؟

نيللي كريم كانت أول مره اقابلها في الحياة بمسلسل عملة نادرة، ست متواضعة جدا وطيبة ومتعاونة، وكانت مفاجأة بالنسبالي، وجمال سليمان اتعلمت منه حاجات كتير لأن شغلي معاه أكتر من نيللي، فنان جبار عنده كاريزما فظيعة جدا ومثقف.

الشغل مع ماندو العدل مفاجأة لأنه من المخرجين اللي بيحبوا الممثل، وشايف الممثل ازاي وبيعرف يوجه صح ودي حته مخرجين كتير مش بيعملوها، بيسيب الممثل يعمل اللي هو عايزه ، لا ماندوا لو شايف غلط بيقول ونعدل، من الأداء ووضعه

هل تخوفت من دورك في عملة نادرة؟

خوفت من رد فعل الناس على عودتي ووجودي في رمضان، لأن مش هكون قد المسؤولية وسقف توقعات الناس يقل، وقبل ما أعمل الدور سألت في الأول عن اللغة الصعيدي، والصعيد معروف أنها لغات كتير، وكلمت عبدالنبي الهواري، المصحح اللغوي وحد محترم وشاطر جدا بحبه أوي، وقابلته قبل ما أروح الشركة واتكلمنا في حاجات في اللغة والتركيبة.

-ما سبب غيابك عن الدراما الفترة الأخيرة؟

مكنش فيه شغل مناسب وأعمال تقدمني بشكل كويس، وترضي طموحاتي، أنا بحب أعمل حاجه كويسه مش ضروري أبقى أنا بطل المسلسل، اي المشكلة إن أعمل دور في المسلسل مع بطل أو بطله بس تبقى حاجه كويسه، وكل شخصية مختلفة بتضيف ليا لإن بحب الشخصية المؤثرة واللي متتنسيش وإني مكررش نفسي.. نفسي أشتغل مع مخرجين كتير زي شريف عرفة ومحمد شاكر خضير

-هل ترى أن هناك منافسة في رمضان 2023؟

الأعمال في رمضان فيها منافسة شريفة، بس بيعيب الموضوع ده إن الأعمال بتتاخر شوية، والأعمال اللي برا موسم رمضان بتاخد حقها أكتر