ياسمين عز: عيب تسألي جوزك هتأكل إيه أنتي أكيد عارفة هو بيحب إيه؟

وجهت الإعلامية ياسمين عز بعض النصائح للزوجة المصرية للتعامل مع زوجها خلال شهر رمضان الكريم. وقالت «ياسمين» عبر برنامجها «كلام الناس» الذي يعرض عبر قناة «إم بي سي مصر»، اليوم السبت: «أولًا بلاش السؤال اليومي المعتاد بتاع أعملك إيه على الفطار، اعملي أي حاجة، وعيب عليكي بعد كل السنين والعشرة دي، إنك مش عارفة هو بيحب ياكل إيه ومبيحبش إيه».

تصريحات ياسمين عز:

وأضافت: «المشكلة إنك بتسألي السؤال 15 مرة كل يوم، وانتوا بتتسحروا بتسأليه هتاكل على الفطار، والصبح أول ما يصحى نفس السؤال، ولما يروح الشغل تتصلي بيه عشان نفس السؤال، لدرجة إن وهو بيفطر تسأليه هتفطر إيه بكره إيه على الفطار، زهق ومل، خلي بكرة لبكرة».

وتابعت: «هو إنتي عمرك عملتي أكل، والراجل اعترض عليه، بيبقى الأكل محروق وناقص ملح ورزك معجن وبياكل، وبيكتم في قلبه، وياكل ويقولك تسلم إيديك، بلاش السؤال ده وخاصة أول أسبوع في رمضان».