هيسافر ألمانيا.. صديق الفنان أحمد ثروت يكشف تفاصيل حالته

كشف أحد أصدقاء الفنان أحمد ثروت نجل المطرب محمد ثروت، بأنه سافر ألمانيا، للخضوع إلى عملية جراحية دقيقة بالمخ، ليتم بعدها التعرف على نوع المرض، ووضع بروتوكول خاص لعلاجه في الفترة المقبلة.

وكتب أسامة بدران، صديق أحمد ثروت عبر حسابه الشخصي بموقع التواصل الاجتماعي “فيسبوك”: "أحمد ثروت زميل صنعة زي ما بيقولوا، ومن شوية ضغط في الشغل في خلال السنوات اللي فاتت، جات له جلطة في عينه الشمال، والحمد لله بتتحسن ولكن تطور الموضوع أكتر، وجه له مرض في الأعصاب نادر أوي اسمه متلازمة الميلر فيشر، وده مرض بيجي 1٪؜ في المليون، بيخلي الجهاز المناعي يهاجم الجهاز العصبي، وحاليًا مأثر على رجله الشمال تمامًا، واليمين بنسبة 50٪؜ زي ما أحمد قال لي".

أسامة بدران: أحمد عنده عزيمة كبيرة

وتابع: "الحمد الله عزيمة أحمد في حتة تانية خالص، وبيهزر وبيضحك ومؤمن ومبسوط أن ربنا اختصه، بس النهاردة يوم مهم جدًا، أحمد سافر لألمانيا، علشان المرض ده محتاج مركز متخصص لعلاجه، والنهاردة هيسحبوا عينة مياه من المخ، علشان يحددوا الموضوع أكتر، ويحطوا بروتوكول للعلاج بإذن الله".

وأضاف صديق ثروت: "بناء على نتيجة النهاردة، هيتحدد حاجات كتير أوي، فضلًا وليس أمرًا ندعي لأحمد، لعلكم أقرب إلى الله أنه يشفيه، ويهون عليه ويربط على أبوه الخلوق الجميل، وأمه وأخته وخطيبته".