محمود جابر: «ربنا أنعم عليّا بنعمة إني ماليش في السوشيال.. وهنكون بشكل تاني قدام السنغال

تحدث محمود جابر المدير الفني لمنتخب مصر للشباب، عن المواجهة المُقبلة أمام السنغال في الجولة الأخيرة من دور مجموعات بطولة كأس الأمم الإفريقية تحت 20 عامًا.

وتعادل منتخب مصر في الجولة الأولى أمام موزمبيق بدون أهداف، ثم خسر من نيجيريا بهدف نظيف، ويتبقى له مواجهة أخيرة في دور المجموعات، غدًا السبت، أمام السنغال، وتُعد الفرصة الأخيرة للشباب من أجل التأهل إلى الدور الثالث كأفضل 3 منتخبات بالمركز الثالث.

وقال محمود جابر في تصريحاته خلال المؤتمر الصحفي اليوم الجمعة: “الجميع منتظر ماتش بكرة اشتغلنا على الجانب النفسي حسيت اللاعيبة عندها تحدي وصلنا ليهم إن في أمل وفي استجابة كبيرة من اللاعبين واستعداد ذهني وبدني وفني، بنحاول قد ما نقدر نرجع اللاعيبة تاني علشان تركيزهم يكون في الملعب بوعد إن محدش يبخل بأي جهد علشان يكسب الماتش.

وتابع: “جمال علام قعد مع اللاعيبة بعد المباراة الأخيرة وأعضاء المجلس اتصلوا وكان موجود أبو الوفا والكومي مشهور، تركيزنا في ماتش بكرة، لو في قصور كنت أنا اتكلمت، لو بصينا للأمور بشكل عام، في توفيق وعدم توفيق، خلقنا فرص سهلة جدا قدام نيجيريا، اللاعيبة حاولت تنفذ وتعمل المطلوب، الموضوع مش إعداد غير جيد، كنا محتاجين شوية حظ.

وأضاف: “محتاجين تركيز وهدوء ومحتاجين نسبة حظ والحظ بيجي للمجتهد واحنا اجتهدنا ولو كنا موفقين في فرصة واحدة قدام نيجيريا كان الوضع اختلف لكن طالما ارتضينا نكون في المكان ده لازم نتقبل الانتقادات.

وواصل: “الماتش اللي فات اعتمدنا على كرات طويلة وكرات من العمق لكن كل الأمور دي متوقفة على تركيز اللاعيبة، في مباريات كتير قوية وكسبناها بفرص أقل من اللي جاتلنا في ماتش نيجيريا، ماتش موزمبيق الشوط الأول مكناش جيدين واتحسنا في الشوط الثاني، وماتش نيجيريا كنا جيدين، وأتوقع بكرة نقدم ماتش كبير”.

وأردف: “خلقنا فرص في ماتشين موزمبيق ونيجيريا، أنا اتفرجت على ماتش السنغال ونيجيريا، السنغال جابت جول وخلقت فرصة واحدة، إحنا خلقنا فرص كتير أمام نيجيريا، كون إننا مسجلناش دي حاجة مش مشكلة لكن تبقى مشكلة لو مخلقتش فرص إنما طالما بتخلق فرص يبقى محتاج تركيز في إنهاء الهجمة واهتمام أكبر”.

واستمر: “ربنا مديني حاجة كويسة إني ماليش في الميديا مقريتش حاجة ولا اتفرجت بالنسبة للاعيبة بحاول أخد منهم التليفون لكن هنا متابعين، الانتقاد ممكن يبقى تحدي للاعبين يثبتوا ذاتهم، العلاقة بيني وبين اللاعبين جيدة جدًا بعرف إزاي أدخلهم في مناطق معينة علشان أحفزهم وأنا شايف في تحدي عند اللاعيبة.

واختتم: “طلبت من الجميع الهدوء بعد الماتش الأخير ومحصلش أي اجتماعات إلا بعد الغدا في اليوم التالي وبدأنا جلسات فردية وطلعت من اللاعيبة حاجات هتشوفوها بكرة، لازم يكون في دعم للاعبين.