5% فقط اللي بقوا بيدخلوا السينمات.. عمرو سلامة يكشف سر قلة إيرادات الأعمال الفنية

كشف المخرج عمرو سلامة، السبب الرئيسي في قلة إيرادات السينما في الفترة الأخيرة، مشيرًا إلى أن الظروف الحالية لا تساعد على نجاح أي نجم.

وكتب عمرو سلامة عبر حسابه الشخصي بموقع التواصل الاجتماعي فيسبوك:لو قسمت أكبر ايراد لفيلم مصري على متوسط سعر التذكرة هتلاقي عدد اللي دخله ٢ مليون شخص،لو ضربت الرقم ده حتى في ٣، هيطلع ٦ مليون شخص.

سر قلة إيرادات السينما

وأضاف:ستة مليون بالكثير قوي من ١١٠ مليون مصري،٥٪؜ من المصريين فقط قادرين يروحوا السينما.واعتقد النسبة هتقل بسبب الظروف الاقتصادية الحالية، أصل مين الاسرة اللي قادرة تصرف بمتوسط ٥٠٠ جنيه في ساعتين؟.

وواصل: سينمات وسط البلد والاقاليم اللي كانت تقدر تنجح فيلم زمان، وصنعت نجوم، دلوقتي ماتقدرش تنجح فيلم ولا تصنع النجم الشعبي، لان سعر تذكرتها دلوقتي لا يقارن بسعر التذكرة في المولات.لذا تحولت السينما دلوقتي لسينما الأغنياء والميسرين، جمهور المولات فقط دلوقتي اللي يقدر ينجح فيلم أو يخليه يفشل.وده غير شكل السينما، هل غيرها للأفضل أو الأسوأ؟ سؤال صعب نعرف اجابته.

سر قلة إيرادات السينما

وأردف:لكن من المؤكد إنه بيقتل سينما الناس، سينما الغلابة، سينما هموم المجتمع، السينما السياسية، السينما الاجتماعية، السينما المتعاطفة مع مشاكل الانسان البسيط.

وأختتم عمرو سلامة قائلًا:هل لو نزل النهاردة فيلم من أفلام عاطف الطيب، بشير الديك، محسن زايد، وحيد حامد، فيلم زي الكيت كات، فيلم الإرهاب والكباب، فيلم سواق الاتوبيس، هل أي فيلم من دول هينجح ويشتغل في سينما المولات؟ هيعرف المنتج يبيع توزيعه لسينمات الخليج ويقبل عليها الموزع الخارجي اللي أصبحوا مصدر مالي مهم لنجاح أي فيلم؟ السؤال الأهم، الأفلام ديه أصلا هتلاقي اللي ينتجها النهاردة؟.