هاني رمزي: الإقامة في أمريكا صعبة.. وتراب مصر غالي

كشف الفنان هاني رمزي، عن تفاصيل وكواليس تقديم فيلم صعيدي في الجامعة الأمريكية، لافتًا إلى أنه إذا اجتمع فريق العمل لأداء جزء ثانٍ سيكون جاذبًا للجمهور.

وأضاف خلال استضافته في برنامج «حبر سري»، المذاع عبر فضائية «القاهرة والناس»، مساء السبت: «كنت في الفيلم شايف أن أمريكا حلم بس ده العكس تمامًا.. حاليًا عندي إقامة في أمريكا وشوفت الواقع هي مبهرة وسياحة حلوة بس العيشة صعبة هناك ومصر ترابها غالي وليها سحر خاص رغم الظروف اللي بنمر بيها».

واستكمل: «لو دوري في صعيدي في الجامعة الأمريكية صغير عادي والسيناريو لو أصر أن أبقى ضيف شرف مش هيبقى عندي مشكلة».

هاني رمزي عن حسن حسني:

وأضاف: «ولا فنان موجود يحل مكان حسن حسني، وفيه ناس كده مش هعرف استوعب بديل لها ومكانه سايب فراغ كبير جدا، وكان بيفنن في أي مكان ويسد في كل حتة».

وتابع: «بيومي فؤاد مش بديل لحسن حسني ولكن هو له شخصيته وطباعه وأسلوبه في الكوميديا، وظلم لبيومي يروح لمنطقة حسن حسني، وكويس إنه محافظ على نفسه في منطقة وحتة معينة».

تصريحات هاني رمزي:

واستكمل: «أنا قلبي ضعيف وكنت بقلق على اصدقائي خلال برنامج المقالب بتاعي، وفي حاجات متتقلش على الكاميرا، وفي ناس رفضت تعرض الحلقة زي وليد توفيق وديانا حداد رفضوا، وأنا مبحبش أزود على الضيف ولا اتجاوز معاه».