ميدو بعد صورته بالمصحف:« أنا بقالي فترة بصلي وبقرأ قرآن ووصلنا لمرحلة أن لو واحد فاتح باب مع ربنا الناس بتتريق عليه»

خرج أحمد حسام ميدو نجم الزمالك السابق والمدير الفني لفريق الإسماعيلي، عن صمته بعد السخرية من الصورة التي ظهر فيها قبل مباراة الداخلية في الدوري، وهو يحمل المصحف الشريف.

وقال ميدو في بث مباشر عبر حسابه الرسمي بموقع التواصل الاجتماعي “انستجرام”: “امبارح نزلي صورة وأنا ماسك المصحف في الملعب، ناس عمالة تتكلم عن الصورة وازاي وو.. وهو أنا لازم أعلن عن علاقتي بربنا قدام الناس يعني؟!”.

وأضاف: “وعلى العموم أنا بقالي فترة بصلي وبقرأ قرآن، هل إحنا وصلنا لمرحلة أن لو واحد فاتح باب مع ربنا الناس تتريق عليه، ده اللي إحنا عايزين نعلمه للأجيال الجديدة”.

وواصل: “بعمل حاجات غلط كتير بس بستغفر ربنا ومش لازم أطلع أعمل فيها شيخ وأقول بعمل وبعمل وبعمل، ياريت نعلم عيالنا الحاجات الصح وأنهم ما يتريقوش ويقولوا مترادفات على كل حاجة ونخلي الأجيال الجديدة أجيال نضيفة”.

واختتم: “وآخر حاجة هقولها مبرووك للدراويش ولسة معلمناش حاجة، واللي جاي أحسن”.

يذكر أن الإسماعيلي نجح في تحقيق فوز ثمين على الداخلية بثلاثة أهداف مقابل هدف، أمس الجمعة، في الجولة الـ 16 من عمر مسابقة الدوري المصري الممتاز.