تامر أمين: من أجمل خلق الله وملوش علاقه بأخوة رامز اللي المفروض يطلع حاجة هو كمان

قال الإعلامي تامر أمين خلال برنامجه المذاع على قناة النهار، أن الفنانين والإعلاميين وأصحاب القدرة المالية، لابد أن يتبرعوا لمصر خلال هذه الفترة العصيبة، كي تستطيع مصر تجاوز أزمتها.

وقال أمين عن تبرع الفنان ياسر جلال: “الفنان ياسر جلال إتبرع بملبغ 3 مليون لصندوق تحيا مصر، أنا بشكر ياسر، أنا اعرفه اكتر من 30 سنة، من التسعينات، ياسر من أجمل وأطيب خلق الله، ملوش علاقه بأخوة رامز خالص”.

وأضاف: “رامز في حته وياسر في حته، عكس بعض رامز جنان وشعوذة وهيبرة، وياسر أدب وهدوء وكسوف واخلاق وكل حاجه حلوه، طبعا أنا بشاكس رامر ده أخويا من زمان “.

تصريحات تامر أمين

واستكمل: “في مدرستين في فكرة ثقافة التبرع، مدرسة بتقول إتبرع واتصدق وطلع مساعدة من غير ما تعلن عنها علشان الثواب يكون كله جاي ليك دون شبهة دعايا، ومدرسة تانية بتقول لا لازم تعلن عن هذه المساهمات ده مهم جدا ومحفز للأخرين علشان يعملوا زيه”

واستطرد: “وانا الحقيقة من أنصار المدرسة التانية، لأن الموضوع جوه قلبك ونيتك، وربنا وحده رب النوايا والقلوب، وفي ذلك فليتنافس المتنافسون، خلوا ده يتحول لعدوى إيجابية ”

ووجه رسالة مازحا لرامز جلال: “18 سنة بتعمل مقالب، مفيهاش حاجه يا رموزه لما تتبرع وكمان الإعلاميين والفنانين وزي ما بقولكم أنا دايما ف فقرات البرنامج الخيرية، “ما نقص مال من صدقة”، صدق رسول الله صلى الله عليه وسلم”.