أنتي مش هترضي بأقل من ملياردير وخمس خدامات.. خبير أبراج يفتح النار على ياسمين عز

فتح خبير الأبراج علاء منصور النار على الإعلامية المصرية ياسمين عبد بسبب نصائحها التي تقدمها للسيدات بشأن الرجال خلال برنامجها كلام الناس المذاع على قناة Mbc مصر الفضائية.

وكتب منصور عبر حسابه الرسمي بموقع التواصل الاجتماعي فيسبوك: سؤال بجد يا ياسمين.. هتقولى لجوزك يا أستاذ محمد ؟؟هتقوليله.. هفرش فستانى اللى إنت جايبهولى عشان تمشى عليه بجزمتك !!! هتدى لحماتك مفتاح شقتك ؟؟ هتعملى شاى لأخوكى الفرعون الصغير ؟؟.

وتابع: ياسمين.. إنتى مش هترضى بأقل من ملياردير يا ياسمين و هتطلبى 5 خدامات على الأقل يا ياسمين و مش هتطبخى ولا هتعملى أى حاجة من اللى بتقوليها للناس ديه يا ياسمين..ياسمين إنتى شاطرة و إتشهرتى خلاص..و كنتى مذيعة شاطرة فى برنامج صباحك مصرى على Mbc Masr اللى كنت بتشرف بظهورى معاكى فيه كضيف ثابت زمان يا ياسمين.

وأضاف: فوقى و إلحقى صلحى اللى عملتيه و وجهى الناس لشئ يفيدهم و يفوقهم بدل اللى بتقوليه ده يا ياسمين 😊شهرة التريند مش بتدوم يا ياسمين ✋

قالت ياسمين عز: : ليه بتنادي على جوزك محمد بس المفروض تقوليله يا أستاذ محمد ومتاكليش أخر حاجة في اسم الراجل بعد اذنك، مينفعش تقوليله يا محماا قولي محمد.. زي مانتي مش بتحبيه ياكل اسمك ويقولك يا سمااا بدل سماح انتي كمان متعمليش معاه كدة.

وتابعت: يا أداة نداء تطلعي بيها وتعلي بإستاذ ومحمد بالصوت الشتوي وهتقولي ليه أقول يا مش أيها، عشان يا للقريب الحبيب أيها للبعيد الغريب.

وأضافت: أستاذ محمد مش بينزل السبت انتي كدة هتهزي الكيان وكيان أستاذ محمد محدش يجي جنبه، واحنا لازم نحافظ على تفخيم القدوة.

وتحدثت ياسمين عز على تعامل الزوجة مع زوجها المهندس، فقالت: لو جوزك مهندس لازم تحسسيه بالدفا والحنان لأن حياته كلها مربعات ودواير ومستطيلات، ومحتاج يرتاح، وبروزي اسمه بين قوسين مفخمين ومزركشين ومزينين، قولي له الباشمهندس وفخمي فيه قدام صحابك، الباشمهندس خارق يقدر يعملك أي حاجة.

وأردفت عن الزوج الدكتور: وياهناها يا سعدها الي تتجوز دكتور، والمفروض اللي تتجوز دكتور تحمد ربنا عليه طول العمر وتبقى ماشية بالسي في بتاع جوزك، الدكاترة دول هما ملائكة الرحمة

واختتمت ياسمين عز حديثها قائلة: حبي جوزك وراجلك ولازم يكون صوتك هادي وناعم وإفخري بيه وحسسيه دايما بمجهوده في شغله.

وأشادت ياسمين عز كعادتها بالرجل، فقالت: انتي بتجيبي بمئات الجنيهات كريمات لوشك وبردو بيطلعلك الحباية لكن أخوكي البدر المنوربيمسح بس وشه بالفوطة بيطلع يلمع، والبنات يفضلوا يقولوا شوفت أخوها بيلمع ازاي وبيشرفك قدام العمارة وقدام صحباتك البنات، اديله ضلفة من دولابك، مش معقول كم الهدوم اللي انتي مكربساها في الدولاب وبعد كدة تقولي معنديش هدوم يابابا وادفع يابابا.