الرئيس السيسي: كنت ببكي على مصر في 2011 .. وشكلي كبر من الخوف على البلد والناس

كشف الرئيس عبدالفتاح السيسي، عن أصعب موقف مر عليه أثناء تواجده بالقوات المسلحة، وذلك ردًا على سؤال للطالب رامز ممدوح، باحتفالية “قادرون باختلاف” اليوم الأربعاء.

وقال الرئيس السيسي: “أصعب وقت عدى عليا كان في 2011.. والله يعلم ما في نفسي في اللي بقوله دا.. أنا كنت ببكي على مصر يا ابني .. حسيت إنه ممكن الأمور تخرج عن السيطرة وتخش في دوامة كبيرة جدا من الخراب والدمار، وكنت عارف إن عددنا مش قليل وظروفنا كدولة صعبة ومش مستحملة أبدا تدخل في أمور زي كده.. وكنت حاسس بالخطر الشديد”.

بكيت على البلد

وأضاف: “أقدر أقولك بدون مبالغة في الوقت دا مكنش باين عليا سن خالص .. هاتوا صوري وأنا موجود في الفترة دي متدونيش أكتر من 30 سنة .. لكن اللي حصل والخوف على البلد والناس وأكتر حاجة صعبة أن تشعر أن أهلك وناسك ممكن يضيعوا وأنت مش عارف تعمل حاجة .. مش أنا بس وفيه ناس كتير في مصر والجيش بالذات عندهم القلق دا والخوف دا أن الأمور تخرج ويكون فيه حاجة صعبة”.

وتابع: “بقولها بعد 11 سنة .. لازم تعرف وإن المصريين يعرفوا إن اللي حمى مصر ربنا سبحانه وتعالى وأنا من الناس اللي شافوا حجم الدمار اللي كانت داخلة فيه البلد يمكن 20 ولا 40 سنة قدام.. مفيش حد تاني حمى البلد.. والبلاد اللي جنبنا أنتوا شايفين اللي دخل ومرجعش .. ومصر أضعف ظروفا من البلاد دي .. فلو كان حصل شكل من أشكال الاقتتال والحرب الأهلي في 2012 و2013 كانت الأمور هتكون صعبة”.

وشدد الرئيس السيسي على أن الجيش والشرطة والدولة دفعت ثمنًا كبيرًا للغاية خلال السنوات الماضية.

وقال: “تقديري ليه ربنا عمل كده مع مصر؟ تقديرا في مصر وحبا لمصر وشعبها.. فاللحمد لله إن ربنا نجانا وعداها بسلام وإن شاء الله بفضل الله الجي أفضل”.