سيد علي يهاجم وزيرة التضامن: أنتي سيبتي القصر العيني والنجوع والقرى، وروحتي لمستشفى 57357 لإنها بقت التريند

هاجم الإعلامي سيد علي وزيرة التضامن الاجتماعي الدكتورة نيفين جامع لتبرع الوزارة إلى مستشفى 57357 لعلاج سرطان الأطفال بـ 75 مليون جنيه.

سيد علي يهاجم وزيرة التضامن

وقال الإعلامي سيد علي عبر برنامجه حضرة المواطن المذاع عبر قناة الحدث اليوم: لفت نظري أوي ما يثار في الإعلام بقالنا فترة مستشفى 57357 بقت تريند، وأنا في البرنامج ده وكتبت مقالات كتير جدًا على مجانين التريند، لإن ده اللي بيحكم حياتنا وسلوكنا اللي هو مثلا نلاقي الراجل بتاع الكشري نلاقي الناس اتكلمت عنه ف اللي هو الاقي فنان اتكلم عنه ويعملوا تمثال من العجوة بيه وبعدين ياكلوه، متابع أنا حاجات التريندات دي وقاعد اتفرج، وكل ما حد من الاعداد يقولي في تريند اقوله مش عايزه،

يحكم حياتنا الكلام على التريند

وأوضح: أنا مش متخيل إن ممكن يحكم حياتنا التريند، ربما يكون ذلك مقبولًا لـ أشخاص كتير جدًا لكنه ليس مقبولًا لوزير أو وزيرة، وأنا آخر واحد ممكن يكون في شبهة إني أهاجم المستشفى ربنا يعمل أنا من الناس اللي ساهمت في صناعة المستشفى، وربنا عارف أنا أكتر واحد اتعرضت لضغوطات قد ايه، لكن مطلعتش واتكلمت.

وأضاف: أنا من بين سويف وعارف حجم المرضى اللي عندنا، مستشفيات كتيرة تعاني بشكل غير عادي، ودي مستشفيات حكومية، لكن أنا اكتشفت فجأة إن وزيرة التضامن عملت زيارة واتبرعت لمستشفى 57357 بـ 75مليون جنيه، الحقيقة سيادة الوزيرة أنا أكتر واحد ساهمت، لكن أنا بعتذر سيادة الوزير الناس كلها بتقول أنتي سيبتي القصر العيني والنجوع والقرى، وروحتي لمستشفى 57357 لإنها بقت التريند يا سيادة الوزيرة، كل مستشفى ووحدة رعاية في ريق مصر، محتاجين حد يطبطب عليهم، لكن مش لاقيين حد يظهروا من خلاله.

مسؤولي مستشفى 57357 يحصلون على أوسكار

وتابع: أنا بقيت بشوف برامج وصحفيين، بقوا بيتكلموا عن واحده اتخانقت مع جوزها عشان يتكلموا عنها والمشاهدات، في الوقت اللي إحنا عايزين نصنع وننتج، مش عارف أيه قيمة راجل اتخانق مع مراته، وفنان وفنانة أنا مالي، سيادة الوزيرة أنا أعلم إن حضرتك تعلمي إن ريف مصر ومؤسسات حكومية كانت محتاجه 10 مليون او 20 مليون، او 50 مليون، تشيل بيها حاجات كتيرة جدًا.

وأتم:المشكلة مش بقول كده لوزيرة التضامن أنا بقول لمصر كلها، أنا اعترف وأبصم بالعشرة إن مسؤولي مستشفى 57357 يحصلون على جائزتي أوسكار ونوبل في الدعايا شاطرين ولازم نسقف ليهم ودي نجحوا فيها لكن في مستشفيات ومصالح محتاجه ده ومحتاجه دعم .