«ليه صوتك سهتان».. ياسمين عز ترد على بعض أسئلة متابعيها

ردت الإعلامية ياسمين عز على بعض أسئلة متابعيها، مشيرة إلى أن هناك الكثير من الأسئلة ومنها (ليه صوتك سهتان).

التعليق خامة الصوت

وقالت ياسمين عز في برنامج كلام الناس: في سؤال بتسأله كتير غالبًا من واحدة بتقول لي كلامك بيعجبني بس صوتك سهتان، شوفي يا روح قلبي أنا صوتي خامته شتوية لأن في أصوات شتوية بتكون ناعم ودافي ونيمان أو نعسان.. أما الصوت الصيفي بيكون عالي وحاد ومصحصح طول الوقت ومش بيفصل.

خامة الصوت الشتوي

وأضافت ياسمين عز: النوع الأفضل بدون انحياز وبكل تواضع خامة الصوت الشتوي.. مش بس لأنه دافي وناعم لكن أول ما بتحبي وتخطبي بتحولي صوتك للشتوي وبعد الجواز يرجع لحالته الطبيعية.

من ناحية أخرى قالت ياسمين عز: بستغرب من بعض الستات لما واحدة تطلق تقول لها مع السلامة يروح واحد ويجي عشرة غيره، هو إيه الكلام ده.. إحنا بقينا ليه نستسهل الموضوع والطلاق، الست لو عندها فستان وقع عليه حاجة او اتنتش بتزعل عليه وتقلب البيت مناحة.. مش عاوزينها تزعل على راجل عاشت معاه سنين.. وطبعًا مفيش مقياس بين الراجل الفرعون والفستان.. الطلاق وخراب البيوت مش بالساهل.

كما وجهت ياسمين عز نصيحة للسيدات والفتيات قائلة: في ناس أول ما البنت تتخطب أو تتجوز يقولولها خليكي على طبيعتك.. اوعي تسمعي كلامهم.. خليكي مع الناس جعفر ومع جوزك أو خطيبك أنعم ما يكون.. وانزلي بالصوت لأوطى طبقة واتكلمي من مناخريك واخنفي.. حتى سعات بتشوفوا ستات مع رجالتها تقولوا عاملة له إيه.. هو اللسان مش بالجمال ولا المال باللسان تلفه وتحطه في قلبها.