ياسمين عز VS رضوى الشربيني.. 5 تصريحات عن الرجل أشعلت معركة إعلامية بينهما 

بدأت ياسمين عز حلقتها بمهاجمة إحدى المذيعات دون ذكر اسمها، بسبب حديثها عن كرامة المرأة بعد الزواج.

وقالت ياسمين: "الحمدلله أن ربنا شغلني بنفسي مش بغيري وده اللي مخليني مبسوطة، قالوا لنا زمان حكمة رائعة، يا محلى المبسوطة قدام المشعوطة".

وتابعت: "المبسوطة كلنا عارفينها، والمشعوطة يعني متشعوطة كده، لا على حامي ولا بارد، مفلفلة اللهم أحفظنا".

ثم بدأت ياسمين عز في توجيه الحديث إلى مذيعة بعينها قائلة: " وأنا لما اتكلم عن الكرامة بين الزوج والزوجة، هو أنتي زوجة؟ لما أتكلم عن الرجل والست، هل أنتي ست؟ هو انتي ست من اللي أنا أقصدها، إطلاقا خالص، فشوفي إذا أنتي ممغوصة بنجاحنا خدي مسكن، وإذا أنتي مشعوطة من كلامنا خدي مهدي".

وأضافت عز: "حابة تكوني ند بند وراس براس عوزي، حابة تكوني مسترجلة حبي، في كل الأحوال النوعية دي بتوع الصوت العالي والردح للرجالة والتحريض على خراب البيوت، حاسبينها على القسم الرجالي، فلما تجيلك واحدة مشعوطة معقدة محرضة، تجاربها فاشلة، وليكن من جماعة الست تبات بره بيتها من غير إذن جوزها، ومن غير ظابط ولا رابط".

وواصلت ياسمين عز حديثها عن تلك المذيعة قائلة: " الهاجس اللي بيكون في حياة المريض اللي عنده تجربة فاشلة، فعايز يخلي كل الستات فاشلة زيه، فتتشعوط أوي من جملتي إن مفيش كرامة بين الزوجين، ومن كتر الشعوطة تاخد الجملة بتاعتي وتعمل حكايات وروايات ونعمل منها حلقات".

ووجهت السؤال للمذيعة، موضحة: "إيه دخلك بالمتجوزين؟ إيه حشرك بين بالمتهنيين؟ إيه علاقتك بالحنية والبنات المتهنية، المنطقة دي محظورة ماتجيش هنا تاني، المنقطة دي كلها دلع حني ستات متهنية، لو جيتي هنا تتحرقي يا ماما".

وأردفت ياسمين عز: "إذا أنتي ممغوصة من حالك، ومشعوطة إحنا مالنا، حاشرة نفسك معانا ليه؟ مركزة معانا ليه؟ كرامتنا وإحنا حرين فيها، إجوازنا وإحنا حرين فيهم".

واسترسلت مقدمة برنامج "كلام الناس" في حديثها الموجه لمذيعة في قناة آخرى: "لو شطبتي أو خلصتي المحتوى دوري تاني، يمكن تلاقي عقدتين تجوزيهم لبعض يخلفوا عقدة صغيرة، تكملي بها المحتوى وتخربي باقي البيوت العمرانة، دي مش مشكلتنا ولا محتوانا".

وحذرت ياسمين عز المذيعة الموجه لها الرسالة قائلة: "لو مالقتيش من عندنا ماتنقشيش، من محتوانا ماتغشيش، وعلى شغل غيرك ماتشتغليش، وعن صوت الجهل وأنتي أهله ماتتكلميش، وفي الدين ماتفتيش وعن رضا الرجال ماتحلميش، وإذا قلتوا عن الرجل لا يجوز، يبقى عشان نرجع نغازل ونقول يجوز، عموما بشكل عام أي حاجة فيها جوز إطلعي منها".

واختتمت ياسمين عز هجومها قائلة: "قلت لك قبل كده من دق الباب لقى الجواب، وفي قانون بتاع نيوتن زمان كنا بندرسه بتاع الفعل ورد الفعل، بيقول لكل فعل رد فعل معاكس له في الاتجاه، مضاعف له في القوة، محذرا له من الرجعة، وإن عدتم عدنا وإن قلتم قلنا".

والجدير بالذكر أن تصريحات ياسمين عز، تأتي بعد أيام من تقديم الإعلامية رضوى الشربيني فقرة ضمن برنامج "هي وبس"، استضافت خلالها الداعية الدكتورة نيفين مختار، للحديث عن كرامة المرأة بعد الزواج وفق ما يكفله لها الشرع.

رضوي الشربيني تهاجم الرجال

واتخذت الإعلامية رضوى الشربيني، موقفًا عدائسًا ضد الرجال، فمنذ ظهورها الأول على شاشة التليفزيون، كان موقفها من الرجل واضحًا فدافعت عن المرأة وهاجمت الرجال في تصرسحات عديدةن جاءت كالتالي:

- «في حاجة اسمها بلوك عارفاها.. بلوك على الفيسبوك.. بلوك على الواتساب.. بلوك تليفونات بلوك بلوك بلوك».

- «مفيش نكد، صاحبة قرارك، مفيش مقارنات، مفيش ضغط نفسي، أكثر وقت بتحبي نفسك فيه، بيكون عندك طموح وأهداف، أكثر وقت بتحبي فيه أهلك وأصحابك، أكثر وقت تقدري تعملي فيه فلوس».

- «وراء كل إمرأة عظيمة نفسها وقلبها.. خليكي مصدقة دايماً أنك أحلى حاجة حصلت في الدنيا».

- «اتجوزي الراجل اللي يخليكي سعيدة ومايلففكيش حوالين نفسك».

- «اتجوزي الراجل اللى حتى لو هو مش موجود تحسي أنه حواليكي وتشعري بأمان وإن عندك ظهر وسند».

- «لا تجعليه كل حياتك الرجل يحب المرأة التي تهمله اخلقي لنفسك اهتمامات متعددة في الحياة».

- «نكد الستات سببه معاملة الرجل السيئة وإهمال احتياجات المرأة وعدم احتوائها».

- «أنا منفصلة وبقولها بكل فخر ومن حقي أتزوج مرة واتنين وأربعة لأن ده شرع ربنا ومش حاجة تعيبني أو تجبرني أكمل في جوازه فاشلة».

كما عقبت الإعلامية رضوي الشربيني علي واقعة عروس الإسماعيلية قائلة: «ده العادي لما التور ينطح البهيمة في الزريبة لكن غير كده قطع إيد كل واحد يمد إيده على واحدة ست».