«كنا بعرفه من ريحة البرفان ».. الإعلامي محمود سعد ينعي الكاتب الصحفي مفيد فوزي

تحدث الإعلامي محمود سعد، عن الراحل مفيد فوزي وعلاقته به، والذي ودع عالمنا صباح اليوم عن عمر ناهز 89 عامًا بعد صراع مع المرض.

وداع مفيد فوزي

وقال محمود سعد في فيديو عبر حسابه بموقع فيس بوك: كان لازم نروح نودع هذا الرجل الكبير، الذي نتمنى أن يكون في مكان أفضل من المكان اللي عايشين فيه.

نجم ساطع

وأضاف: وأنا عائد من وداعه استرجعت ذكرياتي معاه لما دخلنا صباح الخير سنة 78 كان نجمًا ساطعًا في الحياة الصحفية والإعلامية والبرامج والإعداد والتقديم والعلاقات واقتربت منه سنين شوفت خلالهم أحوال كتير جدًا لمفيد ككاتب كبير ورئيس تحرير، وشوفت مجد وقصة نجاح كبيرة لأنه كان مقاتلًا وكان يسمي نفسه المحارب.

حياة مفيد فوزي

وتابع: شوفنا مجد مفيد فوزي لما كنا نمشي في صباح الخير نعرف أنه جه من برفانه وشيكاته ويلبس حاجات مش موجودة في المجتمع، ومكانش عنده مسألة الكبر والتعب ودي الحياة الحقيقية طول الوقت جهد وعرق ومحاولات.

محمود سعد في وادع مفيد

وواصل محمود سعد: وأنا راجع من الكنيسة أبونا كان بيقول كلمات جميلة وأنه انتقل لمكان أفضل ومن الاتساع بعد ضيق الجسد للدنيا الواسعة أوي وللحياة الأبدية، كلام أبونا في الصلاة عجبني قال إن الحياة شقى وتعب وتطلع منها بتعب ومرض وبعدين تبدأ الحياة اللي بجد الناس واللي كل الكتب السماوية أجمعت على أن الحياة التانية هي الحياة بعد الموت، وده مذكور في القرآن فليه الناس بتتصارع مع بعض أو تأذي بعضها من أجل إيه؟.

واستكمل: طيب ليه بنقاطع بعض وليه عندنا القدرة طول الوقت إننا نأذي بعض أوي.. أنت بتتحط في تربة وحيد مفيش حاجة تستدعي كل الصراع ده.

وأردف محمود سعد: وفي النهاية أحب أقول لكم إزاي نتعلم نطبطب على بعض وإحنا أحياء ونراعي بعض مش لما الإنسان يموت.