السبت 3 ديسمبر 2022
حالا
رئيس التحرير
محمود سعد الدين
alshoura ads

كنت بمر بمرحلة حزن وأنا لابساه.. البلوجر نورهان قنديل تثير الجدل بخلعها للحجاب بعد شهر من ارتدائه

نورهان قنديل  موقع بصراحة الإخباري
نورهان قنديل

فاجأت البلوجر ودكتورة التغذية نورهان قنديل، متابعيها عبر حسابها الشخصي بموقع التواصل الاجتماعي لتبادل الصور والفيديوهات القصيرة انستجرام، بخلعها للحجاب من جديد، بعد أقل من شهر على ارتدائه.



وقالت نورهان قنديل: مش عارفة ليه حصل كده بس ده ابتلاء شديد و معنديش تفسير ولا تبرير بس انا كنت بمر بمرحلة حزن و ضعف شديدة من قبل لبسى للحجاب و قلبى و كل حاجة فية كانت بتحركنى ناحية الخطوة دى علشان ابقى اقوى لنفسى و لبناتى و شغلى و ربنا وحده بس هو اللى عالم ضميرى و نيتى …بس النتيجة انى بقيت اضعف بكتير و الخطوة دى بقت محتاجةمنى قوة مش عندى.

 

 

وأضافت: أنا أكيد حزينة انى مقدرتش اكمل فى حاجة بحلم بيها من سنين و بدعى ربنا كل يوم انه يختم حياتى بيها و بدعى ربنا من قلبى يحببنى فى نفسى فى الحجاب الصحيح اللى مقدرتش اعمله.

وتابعت: وحزينة اكتر انى بعلن ضعفى و تشوشى و اضطرابى اللى غلبنى و سيطر عليه و مش عارفة موصلنى لفين، وأسفة طبعا طبعا اسفة انى دخلتكوا معايا فى متاهة قرار شخصى بس هو لانه حاجة الواحد لازم يكون فخور بانه يعلنها.. الحجاب ملهوش اى دعوة بأى توتر انا بعيشه.

خلع نورهان قنديل الحجاب

وواصلت: بالعكس انا عارفة انى اجمل بكتير و انا لابساه، بس فى فرق كبير بين انى اتخلى عنه و بين انى مش عارفة البسه بالشكل اللى يخلينى قوية وواثقة وقد المسئولية، أو ده التفكير اللى للأسف بقى مسيطر عليه و اتخلل لقلبى، مش هحمل الناس طبعا مسئولية حاجة، بس انا حاسة انى بمر بأزمة كبيرة و اكيد كل حاجة خير و ده يقينى بربنا، بس اللى اتكشفلى فى الفترة البسيطة دى كان أكتر من تحملى و لأول مرة اركز فى حجم القسوة اللى فى القلوب.

وأردفت: مش عارفة ليه بس اظن لعنة السوشيال ميديا اصابت قلبى و بقيت حاسة انه مش قادرة على كمية الصراعات اللى بعيشها بسببها و لا مبسوطة بأنى شخصية عامة، أنا هعتبر كل اللى هيحصل من هجوم طبعا ده فى ميزان حسناتى لانى اكيد محتاجة ده، بس يا جماعة و ربنا وحده فقط يعلم، أنا لا و لن اسعى فى يوم لإرضاء احد، أكيد سعيت بكل حب و قلب انى اسيب بصمة و نفع و اثر طيب لبناتى و لكل اللى بيحبنى و ربنا وفقنى و اكرمنى جدا.

واستكملت: نورهان قنديل: ربنا وحده عالم انا بعيش ايه و هو و بس اللى يهمنى، وبعده امى و جوزى و بناتى و شغلى اللى تعبت فيه جدا، وعلى فكرة انا اجتماعيا و شخصيا فشلت كتير يمكن ده اول فشل يكون معلن بالتفاصيل لكن قولتلكم كتير انا وقعت و قمت و هفضل اعافر بس بتعلم، وأظن أخدت درس يسمحلى اقول ان اى حد هيتدخل فى حياتى الشخصية او قراراتى انا هعرضه لمسائلة قانونية لأنى مش معنى انى شخصية عامة يبقى انا مستباحة، أنا ام و زوجة و شخص بيصارع ضغوط الحياة كل يوم ذى اى حد، أنا متقبلة الهجوم او إلغاء المتابعات بصدر رحب جدااا بس الاحترام مش اختيار.

وأختتمت نورهان قنديل قائلة: عندى يقين أن ربنا هيلهمنى الصواب و مش هيسبنى و هيقوينى و يسامحنى لانه ارحم بيه من نفسى.

Go to top of page