سهير جودة: الرجال يعشقون سياراتهم أكثر من الستات ويعتبرون العربية كائن حساس

حرصت الإعلامية سهير جودة، على التعليق على سلوكيات الرجل المختلفة وغير المألوفة لعدد كبير، ومنها اهتمامه الشديد بسيارته، قائلة: “العلماء أكدوا أن الرجل يعتبر السيارة امتددا لنفسه، لذلك الرجال يعشقون سياراتهم أكثر من الستات، ويعتبرون العربية كائن حساس جدا، ويتعاملون معها برفق، وبينضفها ويهتم بيها أكتر من اهتمامه بالست، ممكن ده يكون بسبب أن العربية مبتشتكيش فبيتعامل معاها بحساسية، لكن الست بتشتكي دايما”.

وأضافت سهير جودة، خلال تقديمها برنامج "الستات"، والمذاع عبر فضائية "النهار"، أن دموع الرجل صادقة بصورة كبيرة، معبرة: "كمان الرجل قليل البكاء، ومش بالساهل يعيط، وده بسبب أن القنوات الدمعية عنده أقل من الست، عشان كده دموع الرجل صادقة، لأنها فعل غير مسبوق، لكن في رجالة لو عيطوا بيبقوا بيمثلوا، الرجل مبيعيطش بسهولة، لكن اللي بيعيط للاستفزاز دي بتكون دموع التماسيح".

وتابعت سهير: "الصمت كمان من أسلحة الرجل، والست متعرفش تفسيرها، وتلاقي دايما الرجل بيلجأ للصمت بعد أي جرح عاطفي من أجل التعافي، لأن طبيعته غير الست هي بتحب تفضفض أو تعيط، الرجل بيبقى مرتبك مش عارف يفكر فبيدور على طرق يخرج بيها من أزمته، والست بتقدر تستعيد توازنها أسرع من الرجل".